Běła Woda (JŁu/SN). Wustajeńcu z twórbami rězbarki Doro­theje von Philipsborn (1894-1971) su minjenu srjedu w Běłej Wodźe wotewrěli. W Běłowodźanskim muzeju škleńcy witaše nawodnica muzeja Christine Lehmann něhdźe 30 zajimcow na wotewrjenje wustajeńcy wuměłče Dorotheje von Philipsborn, kotraž je w měsće před 51 lětami zemrěła.

Wuměłča je so w bliskim šleskim Strehlitzu narodźiła a po Druhej swětowej wójnje domiznu wopušćić dyrbjała a sej nowu – najprjedy w Trjebinje a potom w Běłej Wodźe – namakała. Znata je wona přez swoje mjeńše a wjetše spodobne plastiki, předstajejo wosebje dźěći a zwěrjata. Widźeć su wone w blišej wokolinje, ale tež we Wojerecach.

Znata je wulka Boža martra w Slepjanskim Božim domje a tam tež wopomnjenska tafla za padłych Druheje swětoweje wójny, předstajejo tež žarowacu Serbowku. Skerje mjenje je wona drjewjane figury zhotowiła a tohodla je žonjaca trójka – wowka a mać z dźěsćom w Slepjanskej narodnej drasće – wosebitosć jeje skutkowanja a wosebitosć mjez druhim tamnišeje wustajeńcy.