Po hesłom „Rozměr“ bu minjeny pjatk Budyske hudźbne lěćo 2022 w Tachantskej cyrkwi swj. Pětra z twórbomaj Ludwiga van Beethovena a jeho mjeztym nimale pozabyteho rowjenka Friedricha Schneidera zahajeny. Sobotu wotmě so w Žitawskej cyrkwi swj. křiža koncert k tamnišemu póstnemu rubej z lěta 1472.

Budyšin (CRM/SN). Lětuši 550lětny jubilej Žitawskeho póstneho ruba je přičina, zo dósta šwicarski hudźbnik Paul Giger (nar. 1952) nadawk, hudźbnu twórbu k tutej temje stworić. Něhdyši koncertny mišter njeje jenož jako husler, ale tež ze swójskimi kompozicijemi ze wšelakimi instrumentacijemi daloko po swěće po puću. Program z prapremjernej twórbu bu wčera w Michałskej cyrkwi ze samsnymi wuměłcami wospjetowany. Komponist Paul Giger agěrowaše tež tu jako solowy smyčkar. Mjezynarodnje zestajeny ansambl „chant 1450“ wustupi z altistku Giovannu Baviera, tenorom Danielom Manhart, baritonomaj Simonom Machale a Csongorom Szanto kaž tež basistom Jedediahom Allen. Woni su na hudźbu 15. a 16. lětstotka specializowani.