Třeći ligist Dynamo Drježdźany je na cilowej čarje sezony 2022/2023 postup do druheje zwjazkoweje ligi skomdźił. Jedna z přičinow su přěhrate 3 dypki přećiwo Meppenej (1:4). Tohodla trjebaše Dynamo na poslednim hrajnym dnju „třělcowsku pomoc“ wot konkurency. Ta pak porjadnje a spušćomnje dypkowaše. Najebać přesłapjenja rozžohnowa so Dynamo Drježdźany z dobyćom 2:1 přećiwo hosćom z Oldenburga a dźaknymi słowami nadběhowarja Stefana Kutschki a hłowneho trenarja Markusa Anfanga z fanami. A dokelž planowar kadra Kristian Walter na kóncu sezony woteńdźe, je nětko tójšto wot sportoweho šefa Ralfa Beckera wotwisne. Někotre rozsudy su hižo jasne: Kwintet Tim Knipping (škitar), Michael Akoto (srjedźne polo), Robin Becker (škitar), Max Kulke (škitar) kaž tež Patrick Weihrauch (srjedźne polo) třećeho ligista wopušća. Kruće zawjazany pak bu Kyu-Hyun-Park, kiž bě poprawom jenož wot Werdera Bremen wupožčeny. Snano poradźi so hišće engagement najwuspěšnišeho třělca Hallesskeho FC Toma Zimmerschieda. A pola Ahmeta Arslana njeje hišće ničo rozsudźene.