Budyšin (SN/AN). „W cuzbje běch stajnje wćipny, a kaž na ludźi hladach, hladachu woni na mje.“ W nowej wustajeńcy Jürgena Maćija, kotraž je po wernisaži zajutřišim, njedźelu, hač do februara 2024 w Serbskim muzeju w Budyšinje přistupna, wuhladaš cyłkownje štyri po temach wšelake rumy. W kóždym namaka so wotpowědnje hodźacy citat z jeho žiwjenskeho skutkowanja.

W Lichanju rodźeny Jürgen Maćij njeje jenož wukubłany inženjer a fotografikar, ale tež wuměłc. Jako čłon Zwjazka tworjacych wuměłcow běše wot kónca 1980ych lět samostatny a móžeše sej tuž po swojich předstawach a idejach dźěło zarjadować. Skutkowaše pak nimo toho tež za Serbski muzej a běše po swójskim wuprajenju w stajnje dobrej wuměnje ze wšitkimi dotalnymi nawodnikami a nawodnicami. „Běše a je to z nim dobre a wunošne zhromadne dźěło. Jako darićel, ale tež jako čłon spěchowanskeho towarstwa Serbskeho muzeja je nam stajny podpěraćel. Na wšitkich polach zwuraznja zwisk z našim domom“, rjekny wjednica muzeja Christina Boguszowa na wčerawšej nowinarskej konferency.