Berlin (SN/MiP). Sobotu w Berlinskej štwórći Friedrichshain. Je nimale w połnocy. W kopaće połnym klubje „Fisch laden“ hraje Gregor Kliem na swojich huslach, hromadźe z kolegami swojeje skupiny Serbska reja, połny zapala „Daj mě jadno jajko“. Móhłrjec w kolektiwnej ekstazy rejuje publikum spěwajo a skakajo k spěšnje a jara rytmisce interpretowanej serbskej pěsni. „To je kaž w najlěpšim irskim pubje“, přispomni placajo Stefan, student sociologije z Mecklenburgskeje, kotryž běše w štwórći plakat wuhladał a spontanje na „Serbski wječor“ přišoł.

Hłowni organizatorojo hudźbneho eventa su młodźi Berlinscy Serbja Jan Wjesela, Sarah Bulankec a Paul Nagel. „Naličili smy dohromady 140 wopytowarjow, wot tutych běchu 30 do 40 procentow Serbja,“ praji Jan Wjesela. Wšón dobytk wječora chcedźa Budyskemu towarstwu „Bautzen rollt“, swojeho skutkowneho młodźinskeho dźěła dla, darić.