We wobłuku rjadu „Budyske pišćelowe lěćo“ staj organistaj-kantoraj Michael Vetter a Kamil Maksymilian Kulawik wčera zhromadnje w (tachantskej) cyrkwi swj. Pětra koncertowałoj. Něhdźe sto wopytowarjow je zrědka hrate twórby za dwoje pišćele a wukon interpretow ze sylnym přikleskom mytowało.

Budyšin (SN/bn). „Hrajetaj-li organistaj zhromadnje, skići so składnosć, akustiski rum cyle swojoraznje wuhotować. Dołho smój rozmyslowałoj, kak koncert wuhotujemoj, byrnjež hrajne blido wulkeho Euloweho instrumenta nadal trajaceje reparatury dla k dispoziciji njebyło. Ale mamy dźě tu štwore dalše pišćele. Mjeńše byrgle drje njejsu nastupajo spektrum zynkowych barbow cyle tak pisane a wo wjele mjelčišo hač instrument ze 60 registrami, smój pak zwěsćiłoj, zo hodźa so w kombinaciji přiwšěm wuběrnje za wuhotowanje mjenowaneho ruma“, Vetter koncert zahajiwši podšmórny.