Mytowani su k wulkemu cilej přinošowali: stotysac serbowacych w lěće 2100

Na swjatočnym zarjadowanju je předsyda Domowiny Dawid Statnik pjatk wječor w Budyšinje angažowanym Serbowkam a Serbam Myto Domowiny, Myto Domowiny za dorost a Čestne znamješko přepodał. „Tři wodźace słowa Domowiny – zamołwitosć, wotewrjenosć a zwjazanosć – steja zastupujo za skutkowanje dźensnišich mytowanych a charakterizuja hódnoty, za kotrymiž stejimy“, tak Statnik w swojej narěči. Wón dźakowaše so mytowanym za wjelelětne angažowane a čestnohamtske dźěło za serbski lud. Dale wuzběhny, zo čestnohamtscy ze swojim dźěłom rozsudnje k tomu přinošuja, zhromadny cil docpěć: Hač do lěta 2100 měć 100 000 serbsce rěčacych. Je to předewzaće, ke kotremuž mnozy přinošuja. Za mnohostronske a wjele lět trajace čestnohamtske dźěło je Domowina Reginu Šołćinu, Sonju Hrjehorjowu, dr. Michała Hajdana a Luciju Handrikowu z Mytom Domowiny 2024 wuznamjeniła. Za wobohaćenje a wuwiwanje načasneje serbskeje hudźby z wulkim angažementom a „młodym serbskim duchom“ spožčeše třěšny zwjazk skupinje Holaski Myto Domowiny za dorost 2024.