Budyšin (SN/bn). „Zetkanje basniskich generacijow“ je wčera 20 zajimcow do Smolerjec kniharnje přiwabiło. Na přeprošenje spěchowanskeho towarstwa předawanišća předstaji so dohromady pjeć, sydom lětdźesatkow serbskeje lyriki reprezentowacych poet(k)ow ze swójskimi twórbami a někotrejžkuli ­biografiskej anekdotu. Tak přeradźi Pětr Dźisławk, zo nastawaja jeho wjerše předewšěm w zwisku z hudźbu, hdyž rymuje za hiphopowu skupinu Nowa Doba. Sylwiji Šěnowej „basnje prosće tak přińdu“; Timo Meškank skedźbni hesło wječora rozšěriwši na dołhu tradiciju serbskeje poezije, wuzběhujo mjez druhim Kita Lorenca a Jurja Chěžku kaž tež Jakuba Barta-Ćišinskeho, kotrehož 14 zwjazkow wopřijimacych „Zhromadźene spisy“ bě „wot prěnjeje hač do poslednjeje linki“ póžrěł. Měranje Cušcynej je basnić z po­dobnym procesom kaž wuwiwać kriminalku, wšako „maš do napisanja wšitko dokładnje wuskušować“. Róža Domašcyna dopominaše so na literarny kružk ­kołowokoło Kita Lorenca a pozbudźi li­terarny dorost nadal tworić, chwalicy na přikład Hańžu Wjeselic a Šćěpana Ričela.