Zhorjelski krajny rada warnuje po wotpokazanju etata 2025 před sćěhami
Zhorjelc (AK/SN). Zo je wokrjesny sejmik Zhorjelskeho wokrjesa etat 2025 wotpokazał, změje daloko sahace sćěhi. Tole je krajny rada dr. Stephan Meyer (CDU) předwčerawšim, wutoru, hišće raz potwjerdźił. „Njemóžemy swoje zakonske nadawki a běžne winowatosće wjace spjelnić“, wón rjekny. Potrjechene su mjez druhim inwesticije do dróhotwara w Rózbórku, Žitawje a Jonsdorfje. Trěbne twarske naprawy w powołanskimaj šulskimaj centromaj w Žitawje a Lubiju su runje tak blokowane kaž w gymnazijomaj w Běłej Wodźe a Wodowych Hendrichecach. Tež inwesticije do wuchowanskich słužbow w Ochranowje, Žitawje, Mikowje a Habrachćicach dyrbja čakać. Wokrjesny sejmik bě na swojim posedźenju 5. měrca naćisk etata wokrjesa wotpokazał. Wokrjes bě sejmikej etat z deficitom 166 milionow eurow předpołožił a so nadźijał, zo sakske krajne knježerstwo minus wuruna.
