Trenar Wollitz je 400 hrow mustwa FC Energije přewodźał

Z mjenom Claus-Dieter, mjenowany „Pele“ Wollitz, zwjazujetaj němski a tež serbski fan kopańcy dołhu karjeru połnokrejneho nadběhowarja w Osnabrücku, pola Schalke 04 w Gelsenkirchenje abo pola Herthy BSC w Berlinje. Po swojim aktiwnym času je sej jako ekstrowertěrowany trenar wjele připóznaća zdobył. W juliju 2009 započa pola FC Energije Choćebuz. Nihdy njebě tam tón „mudrowacy Wessi“­, nawopak: Wollitz je Choćebuskej a łužiskej wokolinje přewšo přichileny. Aktualnje so wón ze swojim do třećeje ligi postupjenym mustwom nimale hižo w sedmych njebjesach znošuje, wšako FC Energija nastupajo postup do druheje zwjazkoweje koparskeje ligi Němskeje runje rozsudnje sobu rěči.