Budyšin (SN/bn). Loni zahajeny rjad kulturnych zarjadowanjow pod hesłom „Happy Monday Bautzen – Wjesoła póndźela Budyšin“ pokročuje lětsa z někotrejžkuli nowostku. Etablěrowane formaty, kaž su to na přikład „Kupa zbóžnosće“, koncerty, ćicha disko abo poetry slam, wudospołnjeja mjez druhim cirkus k sobučinjenju, naddimensionalna hra „Čłowječe njehněwaj so“ a plećenski projekt „Strickliesel“, z kotrymž ma so hač do kónca lěta pisany, zwjazanosć symbolizowacy a cyłe město wopřijimacy powjaz zdźěłać. Nimo toho maja so po přeću wopytowarjow jědź a napoje poskićeć, kaž hłowna koordinatorka akcije Manja Gruhn z towarstwa Kamjentny dom we wobłuku wčerawšeje nowinarskeje rozmołwy rozłoži. Zaměr zarjadowanjow wostawa po jeje słowach „wutworić pozitiwne rumy, w kotrychž je kóždy witany a kotrež wotbłyšćuja kulturnu wjelorakosć a často čestnohamtski angažement akterow w Budyšinje“. W mjenje Domowiny doda dr. Beata Brězanowa: „Demokratija je předewšěm z dobrych poćahow žiwa. ‚Wjesoła póndźela‘ je w tym zwisku městno zetkawanja a zeznawanja.