Awtor dźensa

Andre Strelow

Liverpool swjeći jendźelske mišterstwo, nimale postup w Drježdźanach a wjele stresa w Španiskej – kónc tydźenja bě zaso połny sportowych a emocionalnych wjerškow. FC Liverpool zdoby sej swój 20. mišterski titul a je nětko zhromadnje z Manchester United najwuspěšniše koparske mustwo kraja. Po wuspěchu 5:1 přećiwo Tottenhamej Hotspur knježeše w Anfield Road ryzy ekstaza. Trenar Arne Slot, kiž ani hišće lěto w zastojnstwje njeje, dowjedźe swojich chowancow njewočakowano k titulej, tež dźakowano wot Jürgena Kloppa wutworjenym strukturam. Fanojo přijachu team hižo do hry z hoberskej party, kotraž so w stadionje pokročowaše. Po zažnym zastatku 0:1 FC Liverpool hru spěšnje zwjertny. Mohamed Salah swoju sylnu sezonu z wrotami krónowaše a to hnydom na trawniku z fanami woswjeći. Titul je tež wuslědk dźěła Jürgena Kloppa, kotryž bě młode talenty a nowopřichady kaž Szoboszlaia a Mac Allistera do mustwa integrował. Slot pak je tutón fundament perfekcioněrował, z tym zo mustwo taktisce hišće wariabelniše sčini.