Na Sprjewi w Choćebuzu wuhladaš tele dny stajnje zaso mustwa, ...
EU z jednym hłosom
Dulig w Praze
Krim nětko z Ruskej zwjazana
Moskwa (ČŽ/K). Prezident Wladimir Putin je zawčerawšim swjatočnje wotewrěł nowy móst, zwjazowacy lěta 2014 zdobytu połkupu Krim nětko direktnje z ruskim teritorijom. Wuwjedł je Putin ceremoniju na swojorazne wašnje. Najprjedy rozhladowaše so po wobchad kontrolowacej dispatcherni, po tym postrowi twarcow nahladneho projekta a naposledk je jako šofer KAMAZa na čole kolony wozydłow z twarskej techniku jěducy wobchad po mosće zahajił.
Dołhodobne strategije trěbne
Druha konferenca dźěłodawarjow mnohe dopóznaća wunjesła
Běła Woda (AK/SN). Jobcenter Zhorjelskeho wokrjesa a Budyska agentura za dźěło předewzaćam radźitej dołhodobnu strategiju wuwić, zo bychu sej fachowcow zdobyli. „Wukubłanje, překubłanje a kwalifikacija trjebaja wěsty předběh. To měli tež firmy wobkedźbować. Jenož tak móžemy je skutkownje podpěrać“, podšmórny jednaćelka Budyskeje agentury za dźěło Ilona Winge-Paul wčera na druhej zhromadnej konferency dźěłodawarjow ze Zhorjelskim wokrjesom. 19 předewzaćow z regiona wokoło Běłeje Wody je so na zarjadowanju z cyłkownje pjeć dźěłarničkami wobdźěliło. Temy běchu mjez druhim strowotny management, kwalifikacija dźěłowych mocow, zapřijeće zbrašenych a strowotnje wobmjezowanych kaž tež zawjazanje migrantow.
Smě piwo „tyjne“ być?
To a tamne (17.05.18)
Prěni cebrasmuhaty přechod za pěškow w formaće 3D w durinskim Schmalkaldenje ma so zaso zhubić. Krajny zarjadniski zarjad je městu zdźělił, zo dyrbi přechod hač do jutřišeho wotstronić, dokelž njewotpowěduje třidimensionalne zwobraznjenje nadróžnowobchadnym předpisam. Trojodimensionalny efekt nastawa přez kombinaciju běłych a ćmowych smuhow na dróze. Šoferojo awtow dóstawaja tak zaćišć, zo tam hrjady leža, a su nuzowani borzdźić.
Do swimmingpoola plumpsnyła je ćeknjena kruwa w delnjosakskim Lanhausenje pola Cuxhavena. Skoćo bě wčera rano z pastwy twochnyło. Přez kerčinu dósta so na ležownosć, hdźež padny do swimmingpoola. Wobydlerjam so poradźi kruwu njezranjenu z wody wućahnyć, a to hišće prjedy, hač přiwołana wohnjowa wobora dojědźe.
Srědki přiměrić
Berlin/Budyšin (SN/at). Budyska zapósłanča zwjazkoweho sejma Caren Lay (Lěwica) kritizuje, zo zwjazkowe knježerstwo w naćisku za etatowy zakoń 2018 žane srědki za nałožowanje serbskeje rěče w digitalnych medijach njepřewostaja. „To dalši raz pokazuje, zo zwjazkowe knježerstwo přechod do digitalneho wěka a přichod serbskeje rěče wohroža“, zwěsći zapósłanča. Lěwica sej žada „srědki zaso přewostajić, zo hodźał so přiměrjeny digitalny poskitk w serbskej rěči wuwić“. W etatowym naćisku je w tym nastupanju přispomnjenje zakótwjene, zo „wučinja suma hač do 31. decembra 2016 njepřetrjebanych srědkow samohospodarjenja 608 000 eurow“. Tež loni njeběchu žane pjenjezy za tón zaměr planowane, lěta 2016 bě jich 765 000 eurow.
Hroža zetkanje wotprajić
Seoul (dpa/SN). Hněwajo so na wojerski manewer njedaloko swojeje mjezy Sewjerna Koreja hrozy, historiske zetkanje mócnarja Kima Jong Una z prezidentom USA Donaldom Trumpom wotprajić. Ze samsneje přičiny su tež za dźensa planowane wujednanske rozmołwy z Južnej Koreju wotprajili. Najebać politiske přibliženje je wójsko Južneje Koreje zhromadnje z jednotkami USA kóždolětny wojerski manewer zahajiło. Sewjerna Koreja ma jón za „wědomu prowokaciju“.
Diplomaća wupokazani
Istanbul (dpa/SN). Turkowske knježerstwo je po israelskim wulkopósłancu tež generalneho konsula kraja namołwiło kraj wopušćić, zdźěla turkowske wonkowne ministerstwo w Ankarje. Je to reakcija na razne postupowanje Israela přećiwo Palestinjanam w Gazaskim pasmje. Mjeztym je tež Israel turkowskeho wulkopósłanca z kraja wupokazał. Turkowski statny prezident Recep Tayyip Erdoğan bě postupowanje Israela „genocid“ mjenował. Na to dóńdźe mjez Turkowskej a Israelom k diplomatiskej eskalaciji.
Nakładne awta do Gazy
