To a tamne (11.09.17)
Třilětna na wulkej nakupowanskej turje: Dokelž chcyše wona rybu wobstarać, zalěze holčka w delnjosakskim Vechelde do busa, zo by do dźesać kilometrow zdaleneho Braunschweiga jěła. Šoferej bě to chětro dźiwne, a wón zawoła policiju. Tež mać bě tam hižo zazwoniła, zo je so dźowka zhubiła. Dźak šoferej wšitko zbožownje wuńdźe.
Rejwanski partner njerukuje za njezbožo zhromadneje rejki, rozsudźi nětko Wyše sudnistwo w Frankfurće nad Mohanom. Skoržiła je 50lětna žona, kotraž bě na narodninach wokoło połnocy sama rejowała. Znaty pak wza ju za ruku, zo byštej so zhromadnje w kole wjerćałoj. To pak bě jej prosće přespěšnje, wona njemóžeše runowahu dźeržeć, padny a so zrani. Sudnistwo měnješe, zo při rejwanju stajnje strach zranjenja wobsteji, a skóržbu na wotškódnjenje wotpokaza.
Serbow zastupować wěc wutroby
Roland Ermer z Njedźichowa (Bernsdorf) je jedyn z mało rjemjeslnikow, kotryž kandiduje k wólbam noweho Zwjazkoweho sejma Němskeje. Pjekarski mišter ma tuchwilny wólbny bój za dosć napjaty, ale so tež wjeseli, zo budźe bórze nimo. „Začuwam wjele pozitiwneho wothłosa na swojich terminach. Štož mje rudźi a za čož zrozumjenje nimam, su nadběhi ludźi, kotřiž spytaja mi wudma nadawajo swoje měnjenje zwuraznić.“ Wot nalěća wojuje Ermer za to, zo by dosć hłosow za swoju stronu CDU a za sebje nazběrał. Srjedźostawske zjednoćenstwo CDU bě jeho za kandidata namjetowało, hewak njeby nastupił. „Mjeztym nimam hižo chwile w swojim pjekarskim zawodźe skutkować a wěm, zo to tež lědma hišće móžu, docpěju-li 24. septembra mandat w zwjazkowym sejmje. Tam pak chcu za naš region a za rjemjesło wustupować.“ Serbske temy chce na městnje zapřijeć, byrnjež so we wólbnym boju serbskich napisow na wólbnych plakatach cyle wědomje wzdał. W Mari Michałkowej widźi wón dale partnerku. „Myslu sej, zo móžu z bojom za zajimy Serbow tójšto docpěć, tež hdyž sam žadyn Serb njejsym.
SPD zhubja hłosy wolerjow
Berlin (dpa/SN). Kaž dobre dwaj tydźenjej do wólbow zwjazkoweho sejma z noweho naprašowanja wuchadźa, SPD z kanclerskim kandidatom Martinom Schulzom na čole hłosy wolerjow dale zhubja. 21 procentow ludźi by socialnych demokratow woliło. CDU/CSU wostawa ze 37 dypkami najsylniša móc. Třeća najsylniša je tuchwilu Alternatiwa za Němsku z jědnaće procentami, Lěwica přińdźe na dźesać, FDP na dźewjeć a Zeleni na wosom procentow hłosow.
Pesco móže bórze startować
Tallinn (dpa/SN). Plany za natwar europskeje zakitowanskeje unije postupuja. Po słowach wonkopolitiskeje społnomócnjeneje Europskeje unije Federici Mogherini móža kónc lěta nowy System za zhromadne dźěło (Pesco) we wěstotnej politice startować. Tole zdźěli Italčanka na schadźowanju zakitowanskich ministrow krajow EU wčera w estiskej stolicy Tallinnje. Přičina spěšnych postupow při natwarje zakitowanskeje unije je wuzwolenje Donalda Trumpa za prezidenta USA. Tón bě sej jasnje sylniši angažement w tymle wobłuku žadał.
Hódnota eura stupała
Dołhe rynki awtow wopušćeja znate kupy Florida Keys do směra na ...
To a tamne (08.09.17)
Skóržbu kandidata za čestny hamt jabłukoweho krala je Choćebuske sudnistwo wčera wotpokazało. 42lětny muž wumjetowaše turistiskemu zwjazkej z Gubina wólbnu manipulaciju. Runje tak nima nětko amtěrowaca kralowna žanu jězbnu dowolnosć, wón měni. Sudnistwo pak rozsudźi, zo to žane zapisane požadanske wuměnjenje njeje. Muž hrozy nětko z ciwilnym jednanjom. Nimo toho předleža sudnistwu dalše skóržby 42lětneho. Wón žada sej wot turistiskeho zwjazka dohromady 25 000 eurow wotškódnjenja.
Stewardesy Aeroflot, ruskeho lětanskeho předewzaća, smědźa nětko tola trochu „tołše“ być. Skóržbu žony, kotraž ma konfekciske čisło 52, měješe sudnistwo za woprawnjenu a přilubi jej 300 eurow. Aeroflot bě stewardesam předpisało, zo smědźa jenož uniformy we wulkosći 42 do 48 nosyć.
CDU je kraj hromadźe dźeržała
Dowólbna rozmołwa z Michaelom Kretschmerom, naměstnikom frakcije CDU w zwjazkowym sejmje a generalnym sekretarom CDU w Sakskej
Mjez Mužakowom a Oybinom je Michael Kretschmer po puću, zo by za politiku CDU a za sebje samoho wabił. 42lětny je wot lěta 2002 zapósłanc Němskeho zwjazkoweho sejma, a nětko we wólbnym wokrjesu 157 (Zhorjelc) znowa kandiduje. Constanze Knappowa je z nim rěčała.
By-li čłowjek diskusijam w socialnych medijach wěrił, potom ćěri knježerstwowa koalicija Němsku do bjezdna – z krizu ćěkancow, dale powjetšacym so rozdźělom mjez chudymi a bohatymi, z dieselowym a jejacym skandalom a dalšimi „twarnišćemi“. Wy pak wulku politiku přiwšěm hišće sytu nimaće?
M. Kretschmer: Wirtuelny rum socialnych medijow w mnohim nastupanju ničo z realnym žiwjenjom činić nima. W Europje płaći Němska jako sylny kraj a spušćomny partner. Tež w ćežkich časach bě naše knježerstwo jednanjakmane. Tohodla je bjezdźěłnosć w našim kraju na jara niskim niwowje, a hospodarstwo a dochody z dawkow rostu. Ale tež w přichodźe budźe wjele nadawkow, a na tym chcu sobu skutkować.
Dwurěčne tafle „njejsu trěbne“
Budyšin (SN/at). Dwurěčne módre awtodróhowe tafle podłu A 4 w Sakskej kaž tež podłu A 13 a A 15 w Braniborskej móhli pućowacych na tu bydlacu mjeńšinu skedźbnjeć. Hižo bywši předsyda Domowiny Jan Nuk bě so swój čas bjez wuspěcha wo to prócował. Nětko je so łužiska zapósłanča zwjazkoweho sejma Caren Lay (Lěwica) zwjazkowe knježerstwo za tym prašała, hač ma wone za móžne, awtodróhowe tafle w serbskim sydlenskim rumje Sakskeje a Braniborskeje dwurěčnje němsce a serbsce popisać, podobnje němsko-čěskemu wuhotowanju w pomjeznej kónčinje k Čěskej.
Wichor hoberske škody zawinił
San Juan (dpa/SN). Wulce strašny hurrikan Irma je w Karibice hoberske škody zawinił a šěsć ludźi do smjerće storhnył. Cyłkowny rozměr škodow njeje dotal hišće jasny, zdźěli francoski statny prezident Emmanuel Macron. Tuchwilu ćehnje wjerćaty wichor dale do směra na Dominikansku republiku. Chětro wěste je, zo tež Floridu trjechi. Dźěle města Miami chcedźa zarjady tuž ewakuować. Kaž wjedrarjo wěšća, nastawatej nad regionom dalšej hurrikanaj.
Bamž w Kolumbiskej
Bogotá (dpa/SN). Wjac hač poł miliona ludźi je bamža Franciskusa w Kolumbiskej z wulkej radosću witało. Hłowa katolskeje cyrkwje chce měrowy proces mjez knježerstwom a FARC-rebelemi podpěrać, kotřiž su lětdźesatki přećiwo sebi wojowali. „Njespušćće ženje nadźiju a wjesołosć“, Franciskus ludźom přiwoła. Wjeršk jeho jězby budźe zetkanje ze šefom bywšich rebelow a z woporami konflikta.
Nochce so wróćo sćahnyć
