Změny njewoprawnjene?
Braniborske knježerstwo chce klimoškitne zaměry wosłabić
Podstupim/Choćebuz (dpa/SN/BŠe). Braniborske ministerstwo za hospodarstwo pod nawodnistwom SPD je w juliju připowědźiło klimoškitne zaměry wosłabić. Pozadk toho je, zo chce wobsedźer Janšojskeje milinarnje, Łužiska energija a milinarnje (LEAG), produkciski čas podlěšić. Runje tak je wobchad na dróhach bóle přiběrał hač wočakowane.
Nětko tež powěsćernja dpa wozjewja, zo braniborske knježerstwo a z nim Lěwica mjeztym rozmysluje, klimoškitne zaměry změnić. Wšako njehodźa so pod tuchwilnymi wuměnjenjemi dodźeržeć. „Klimoškitny plan Zwjazka předwidźi, zo ma so wudobywanje brunicy w lětach 2030 do 2050 zakónčić. Wuchadźamy z toho, zo budźe to w Braniborskej něhdźe wokoło lěta 2040“, wuchadźa z dokumenta, kotryž je frakciski šef Lěwicy Ralf Christoffers parlamentariskemu jednaćelej strony Thomasej Domresej a hospodarskemu fachowcej Matthiasej Loehrej přidźěłał. Ministerski prezident Dietmar Woidke (SPD) je porno tomu stajnje wotpokazował, termin za kónc wudobywanja brunicy mjenować.
To a tamne (23.08.17)
Wopak natankowaneho awta dla dyrbjachu wobydlerjo wjacorych chěžow wčera swoje bydlenje wopušćić. Šofer bě město bencina mylnje wodźikowy peroksid tankował. Wohnjowa wobora w hessenskim Schlangenbadźe dyrbješe tuž jězdźidło do dźěłarnje dowjezć. Dokelž pak bojachu so chemiskeje reakcije, so wobornicy rozsudźichu bliske domy radšo ewakuować. Přiwołani fachowcy wobory pak maćiznu znješkódnichu.
Wjace hač 140 000 pozdatnje falšowanych cigaretow su cłownicy na šwicarskej mjezy sćazali. W němskej rěči wotćišćane warnowanske napisy na tyzkach běchu połne zmylkow. Nimo toho pobrachowaše dawkowe znamješko. Kaž wodźer transportera we Weilu nad Rynom potwjerdźi, bě je pola muža z wukraja kupił. Cigaretowe tyzki pak sej po wšěm zdaću wobhladał njeje.
Diskutuja wo reformaciji
Wittenberg/Halle (B/SN). Něhdźe 120 wědomostnikow z cyłeho swěta diskutuje we Wittenbergu wo „kulturnym reformaciji“. Tema pjeć dnjow trajaceho kongresa njeje jenož wuznam reformacije za teologiju a cyrkej. Su to tež wuskutki na politiku, prawo, hospodarstwo, towaršnosć, wuměłstwo, kubłanje, wědomosć, na wšědny dźeń a popkulturu.
Haseloff přećiwo namocy
Magdeburg/Bonn (B/SN). Ministerski prezident Saksko-Anhaltskeje Reiner Haseloff (CDU) wupraja so w přinošku za projekt „Demokratija trjechi!“ Centralneho komiteja němskich katolikow přećiwo namocy a ekstremizmej. Zatrašenje, difamowanje a wosebje namóc demokratiju wohrožeja. Demokratija ma so přeco zaso nadźěłać a ze žiwjenjom pjelnić.
Atentat w cyrkwi skućili
Ozubulu (B/SN). Při atentaće za čas Božeje mšě w cyrkwi swj. Filipa w nigeriskim Ozubulu zemrě jědnaće kemšerjow, 18 so zrani. Nadpad měrješe so na lokalneho barona za drogi, kiž pak w cyrkwi njebě. Atentatnicy běchu pječa něhdyši komplicy, kotřiž čujachu so wobšudźeni.
Ze syću korupciji zadźěwać
Teroristiska skupina rozbita
Barcelona (dpa/K/SN). Po atentatach w Španiskej z 15 smjertnymi woporami pokročuje policija z přepytowanjemi, byrnjež teroristiska skupina mjeztym rozbita była. „Dwanaće přisłušnikow je pak mortwych pak zajatych“, rjekny šef policije potrjecheneho kataloniskeho regiona. Pozdatneho hłowneho skućićela, 22lětneho Marokkočana Younesa Aboyaaquouba, běchu zastojnicy we wjesce Subirats njedaloko Barcelony zatřělili. Žona bě tam chowaceho so spóznała.
Wjac smjertnych njezbožow
Wiesbaden (dpa/SN). Na němskich dróhach je w prěnim połlěće jasnje wjac ludźi zemrěło hač loni w samsnym času. Tak bě 1 500 ludźi žiwjenje přisadźiło, štož je rozrost 6,2 procentow. Tole zdźěli dźensa Zwjazkowy statistiski zarjad ze sydłom we Wiesbadenje. Najwjac wosobow zemrě w Bayerskej. Najwjetše riziko, smjertnje znjezbožić, mějachu Braniborčenjo. Na milion wobydlerjow zličichu 29 woporow. W Sakskej leži ličba pola 17 mortwych na milion wobydlerjow.
Nowu strategiju předstajił
Wiki kompjuterowych hrow, tak mjenowane Gamescom, su dźensa swoje ...
Zemjerženje na kupje Ischia
Pjenježna nuza BER njehrozy
Rumunska skorži přećiwo MSPI
Hroža nowe napjatosće
Wědomostna słužba pólskeho parlamenta pruwuje žadanja za reparacijemi
Waršawa (dpa/SN). Mjez Pólskej a Němskej hroža dalše napjatosće. Přičina je, zo chce sej pólske knježerstwo wot Němskeje reparacije Druheje swětoweje wójny dla žadać (SN rozprawjachu). Byrnjež so Pólska před lětdźesatkami wotrunanjow wzdała, jeje knježerstwo nětko pruwuje, hač sej je tola wot Němskeje nježada.
To a tamne (22.08.17)
Trawusyčaka dla njemóžeše lětadło w Erfurće přizemić. Wěstotnych přičin je mašina dale lećała, kaž rěčnik lětanišća zdźěli. Wulki trawusyčak bě bjezposrědnje pódla přizemjenskeje čary zasadźeny. Njemóžeše pak techniskeho defekta dla wěstotny wobłuk spěšnje dosć wopušćić. Z Mallorci wróćacy so pasažěrojo lětadła dyrbjachu tuž hišće trochu sćerpni być.
Ćěkancaj ze Syriskeje pomjenowaštaj swoju nětko narodźenu dźowku po zwjazkowej kanclerce. Angela Merkel Muhammed je so 16. awgusta w Münsteru narodźiła, kaž z tamnišeje chorownje swj. Franciskusa rěkaše. Swójba bydli mjeztym dwě lěće w Němskej. Dokelž staj staršej kanclerce jara dźakownaj, staj swojemu pjatemu dźěsću jeje mjeno dali. Prěni tajki pad wšak to w Němskej njeje. Tež w Duisburgu je dźěćo ćěkancow po Angeli Merkel pomjenowane.
