Wopory krawneje bitwy wopominali
Diplomaća USA dyrbja Rusku wopušćić
IG metal: Ekopremija za starše diesele
Frankfurt n. M./Berlin (dpa/SN). Dźěłarnistwo IG metal a zawodne rady wulkich němskich awtotwarcow žadaja sej hladajo na tak mjenowany „dieselowy wjeršk“ zajutřišim, srjedu, rjad hnydomnych naprawow, dokelž maja dieselowe motory tež dale za njeparujomne. Najwažniše su po jich měnjenju bórzomne techniske polěpšenja, zo bychu tež awta z wotpłunowej normu „pjeć“ nowym žadanjam wotpowědowali, rěka w dźensa wozjewjenej zhromadnej deklaraciji. Wjeršk měł wotpowědne směrnicy, zaměry a časowe plany zdźěłać.
Moja stara kara
Wobchod wotewrjeny
To a tamne (31.07.17)
Kokošace a howjaze mjaso z bleše pić budźe wot septembra móžno. Peter Klassen, rězniski mišter z Triera, je napoj wuwił a chce jón po wšej Němskej rozšěrjeć. Móhło to napojowa jědź za ludźi być, kotřiž su wjele po puću, rjemjeslnikow, šoferow nakładnych awtow, ale tež pućowarjow abo sportowcow. Klassen je sej wědomy, zo změje napoj tež přećiwnikow. Přiwšěm hodźi so do časa smoothiejow a spěšnojědźow, wón rjekny.
Na ilegalnu technoparty je so wjace hač 5 000 přewažnje młodych ludźi sobotu njedaloko čěskeho Nymburka zhromadźiło. Policija jich bjez wuspěcha namołwješe teren wopušćić. Tójšto rejwarjow steješe pod wliwom alkohola a drogow. Tuž móžachu hakle wčera domoj jěć. Policija bě prezentna, njetrjebaše pak zapřimnyć. Wona zaraći dróhi, zo njebychu so dalši přidružili.
Kandidatow wobkrućili
Budyšin (SN/at). Dźewjeć direktnych kandidatow nastupi we wólbnym wokrjesu 156 – Budyšin I – za wólby zwjazkoweho sejma 24. septembra. Wokrjesny wólbny wuběrk je wšitke předležace namjety dźensa w zjawnym posedźenju w Budyšinje wobkrućił. Zapodate podłožki běchu pruwowali, a njejsu žane njedostatki zwěsćili, wozjewja wokrjesna wólbna nawodnica Andrea Peter. Na wólbnym lisćiku jako tak mjenowany prěni hłós jewja so sćěhowace mjena: Roland Ermer (CDU), Caren Lay (Lěwica), dr. Uta Strewe (SPD), Karsten Hilse (AfD), Jens Bitzka (Zeleni), Torsten Herbst (FDP), Günter Hutschalik (Swobodni wolerjo), Tobias Faku (BüSo, Wobydlerske hibanje Solidarita) a Andreas Richter (Wobydlerski kandidat – za jednu Němsku – neutralnje+ suwerenje+socialnje).
Ze Smělneje pochadźacy Richter je kandidat-jednotliwc a nima podpěru žaneje strony abo zjednoćenstwa. Za kandidaturu bě 46lětny diplomowy inženjer za ratarsku techniku 203 podpěranske podpisma zapodał, zdźěli Andrea Peter.
Ruska reaguje
Moskwa (dpa/SN). Po najnowšich sankcijach přećiwo Ruskej dyrbja USA swój diplomatiski personal w Ruskej redukować. Washington dyrbi ličbu sobudźěłaćerjow wulkopósłanstwa a konsulatow na 455 pomjeńšić. Runje telko ruskich diplomatow dźěła tuchwilu w USA. Tole je Krjeml dźensa w Moskwje wukazał. Kónc decembra 2016 bě tehdyši prezident Barack Obama 35 ruskich diplomatow wupokazał. Ruska njebě tehdy reagowała. Nětko chce „symetriske wotmołwy“ dać, dyrbjeli-li USA dale jednostronsce přećiwo Ruskej postupować.
Bosch móžny dźěl kartela
Stuttgart (dpa/SN). Dodawar awtowych dźělow Bosch je po informacijach medijow dźěl pozdatneho awtoweho kartela. Kaž Bild am Sonntag po internych podłožkach rozprawja, je koncern awtotwarcam na zhromadnym posedźenju namjety předpołožił, kak móhli problem rjedźenja wotpłuna pola dieselowych jězdźidłow „spěšnje a tunjo“ rozrisać. Bosch nochcyše so w medijach k wumjetowanjam wuprajić.
Chcedźa zakaz ignorować
