„Serbska utopija“
Nowemberske wusyłanja telewizijneho magacina Łužyca zwaža so na „wid do přichoda“ a pokaza we wobłuku 33. Choćebuskeho filmoweho festiwala premjernje předstajeny film „Serbska utopija“. Jako projekt serbsko-němskeje syće Łužycafilm zwoprawdźena produkcija wopřijima krótkofilmy „Dnjownik“ Dirka Lienigsa a „Serbske bratšy“ Erika Šyškoho kaž tež „Serbski telewizor“ Helle Stolecki a Karolin Schneideroweje. Epizody su do ramikoweho sciencefictionoweho scenarija pod hesłom „Nowy swět“ zaplećene.
Telewizija RBB pokaza magacin jutře, sobotu, w 13.35 hodź. Wospjetowanje na samsnym sćelaku slěduje srjedu, 22. nowembra, rano w 6 hodź. Telewizija MDR wusyła Łužycu sobotu, 25. nowembra, w 11.45 hodź. W mediatece ARD je magacin wot jutřišeho cyłe lěto kóždy čas přistupny.
Wjelki, wołtar a wino
Hłowne ćežišćo nowemberskeho wusyłanja telewizijneho magacina Wuhladko je „přiběraca ličba wjelčich stadłow w Sakskej, kotraž wosebje pola plahowarjow skotu w Hornjej Łužicy bjezsparne nocy“ wuskutkuje. Dalši wobšěrny přinošk wěnuja wobnowjenju Chróšćanskeje cyrkwje a poswjećenju tamnišeho noweho wołtarja. Nimo toho portretuja Wawrijec swójbu, kotraž w nazymskim dowolu wino w Awstriskej žněje, a rozžohnuja so z njeboh Benom Budarjom.
Telewizija MDR pokaza Wuhladko jutře, sobotu, w 11. 45 hodź. Wospjetowanje na samsnym sćelaku slěduje póndźelu, 6. nowembra, w 6.40 hodź. Telewizija RBB wusyła magacin sobotu, 11. nowembra, w 13.35 hodź. W mediatece ARD je Wuhladko cyłe lěto kóždy čas přistupne.
Serbska syć, hród a rěč
Podcasty, wideja na youtube a w socialnych syćach, hudźba na streamingowych platformach: Mjeztym eksistuja njeličomne serbskorěčne digitalne poskitki w syći. Oktoberske wudaće telewizijneho magacina Wuhladko podawa so temje wěnujo do- a přehlad.
We wobłuku dnja wotewrjeneho pomnika bě mustwo Wuhladka z hosćom w Radworju. Tam přewodźachu zajimcow, kotřiž so na twarnišću wo stawje saněrowanja tamnišeho hrodu wobhonichu. Dalši přinošk předstaja „rozdźělne warianty“ delnjoserbskeho rěčneho projekta Zorja, z kotrymiž móža sej zajimcy rěč přiswojić. Nimo toho přeproša zhromadnje z „horliwym a akribiskim domizniskim slědźerjom“ Benediktom Cyžom na „wotkrywansku turu“ po Lejnje blisko Pančic-Kukowa, mjez druhim njeparujomnu rólu wsy za twar Budyskeje cyrkwje Marje a Marty a někotrežkuli „potajnstwo“ znateho hosćenca „K Lipje“ wobswětlujo.
Sydlenski rum a jubileje
Ćežišćo septemberskeho wusyłanja telewizijneho magacina Łužyca je prašenje: Kak dale ze serbskim sydlenskim rumom w Braniborskej? Z tymle statusom zaběra so moderator Christian Matthée njez druhim w Dešnje, hdźež so nimo toho spočatk septembra wjele wotmě – mjez druhim narodniny tamnišeho Domizniskeho muzeja a starosłowjanskeho sydlišća „Stary lud“. Dale rozprawja wo starće rěčneho projekta „Zorja“. „Łužyca“ je zahajenski swjedźeń delnjoserbskeho rěčneho projekta wopytała, hdźež sej dorosćeni serbšćinu přiswojeja. Samsny wotmysł tči za „Prózdninskich projektowych dnjach“ – rozdźěl wšak je, zo měri so na dźěći. Nimo toho počesćuja Bogumiła Šwjelu składnostnje 150. narodninow serbskeho bohosłowca a publicista.
Telewizija RBB pokaza Łužycu jutře, sobotu, w 13.45 hodź. Wospjetowanje na samsnym sćelaku slěduje 20. septembra rano w 2.30 hodź. Telewizija MDR wusyła magacin 23. septembra w 11.45 hodź. W mediatece ARD je Łužyca přeco přistupna.
Serbscy lěkarjo a jubilej
Ćežišćo septemberskeho wusyłanja telewizijneho magacina Wuhladko je „powšitkownemu trendej njewotpowědowace wuwiće nastupajo strowotnistwo w Hornjej Łužicy“. W tym zwisku předstaja młodych serbskich lěkarjow, kotřiž so „cyle wědomje za nawrót do domizny rozsudźichu“. Dalšej temje stej wotnětka zakonsce zaručene serbske žónske pomjenowanja w oficialnych dokumentach kaž tež njedawno wotměty Kamjenski lěsny swjedźeń. Nimo toho gratuluja Křesćanej Krawcej k 85. narodninam.
Telewizija MDR pokaza Wuhladko jutře, sobotu, w 11.45 hodź. Wospjetowanje na samsnym sćelaku je póndźelu, 4. septembra, w 6.40 hodź. Telewizija RBB wusyła magacin sobotu, 9. septembra, w 13.30 hodź. W mediatece MDR je Wuhladko kóždy čas přistupne.
Wuknyć w prózdninach
„Ferialny kurs – radšo wopak rěčeć dyžli prawje mjelčeć“ rěka reportaža Romana Pernaka a Stefana Göbela, kotruž telewizijny magacin Łužyca w awgustowskim wusyłanju pokaza. Filmowcaj běštaj wobdźělnikow mjeztym 30 lět wuhotowaneho prózdninskeho poskitka Šule za delnjoserbsku rěč a kulturu w Choćebuzu z kameru přewodźałoj a so mjez druhim wo jich motiwaciji, nawuknyć delnjoserbšćinu, wobhoniłoj.
Telewizija RBB pokaza Łužycu jutře, sobotu, w 13.45 hodź. Wospjetowanje na samsnym sćelaku slěduje srjedu, 23. awgusta rano w 3 hodź. Telewizija MDR wusyła magacin sobotu, 26. awgusta, w 11.45 hodź. W mediatece RBB je aktualne wudaće Łužycy wot jutřišeho cyłe lěto kóždy čas přistupne.
Dowol, luksus, festiwal
Telewizijny magacin Wuhladko wěnuje so w swojim awgustowym wudaću hnydom dwójce temje dowol, a to z přinoškom wo serbskorěčnym prózdninskim lěhwje za dźěći we Wodowych Hendrichecach a z reportažu wo Łužicy jako „boomowacy turistiski region“. Nimo toho portretuja zhotowjerja luksusowych časnikow Józefa Brězana a podawaja impresije z lětušeho XIV. mjezynarodneho folklorneho festiwala „Łužica“.
Telewizija MDR pokaza Wuhladko jutře, sobotu, w 11.45 hodź. (tež online jako livestream). Wospjetowanje na samsnym sćelaku slěduje póndźelu, 7. awgusta, w 6.45 hodź. Telewizija RBB wusyła magacin sobotu, 12. awgusta, w 13.45 hodź. W mediatece MDR je Wuhladko wot jutřišeho cyłe lěto kóždy čas přistupne.
Tři festiwalowe wjerški
Julijske wudaće telewizijneho magacina Łužyca wěnuje so třom delnjołužiskim wjerškam minjenych tydźenjow. Nimo rozprawy wo XIV. mjezynarodnym folklornym festiwalu Łužica z wosebitym ćežišćom zarjadowanjow w Hochozy pokazaja přinoškaj wo 3. słowjanskim bajkowym festiwalu w Dešnje kaž tež wo 2. literarnym a hudźbnym swjedźenju w Lubinje.
Telewizija RBB wusyła Łužycu jutře, sobotu, w 13.35 hodź. Wospjetowanje na samsnym sćelaku slěduje srjedu, 19. julija, rano w 3 hodź. Telewizija MDR pokaza magacin sobotu, 22. julija, w 11.45 hodź. W mediatece ARD je wusyłanje wot jutřišeho cyłe lěto kóždy čas přistupne.
Forum a jubilej
Hłowna tema julijskeho wudaća telewizijneho magacina Wuhladko „Serbski muzej, centralna biblioteka a kulturny archiw pod jednej třěchu“ wěnuje so Serbskemu forumej wědy při Lawskim arealu w Budyšinje. Planowany twar „je drje jedyn z najwjetšich a najnaročnišich twarskich projektow Serbow, za kotryž chcedźa wjace hač 40 milionow eurow inwestować“.
Dalše přinoški wusyłanja su „Serbšćina w hospodarstwje“ wo předewzaću TDDK w Nadróznej Hrabowce, „Pěši po dwurěčnej Hornjej Łužicy“ wo tak mjenowanym Slaviamaršu a „Z hosćom pola Wilhelma Piecka, portet to Rownjanki Hanamarije Měškankoweje, kotraž swjeći w požnjencu 90iny.“
Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 3. julija, w 6.50 hodź. Telewizija RBB pokaza magacin sobotu, 8. julija, w 13.35 hodź. W mediatece MDR je Wuhladko wot jutřišeho cyłe lěto kóždy čas přistupne.
