Choćebuz (SN). Tema přichodneho wusyłanja magacina Łužyca telewizijneho sćelaka RBB rěka „Pytanje za serbskimi filmami“. Pod tymle hesłom rozestaja so Knut Elstermann z prašenjom, što „serbski film“ poprawom je. Za tym njeje so jenož filmowcow woprašał, ale je tež někotryžkuli archiw přeslědźił. Ze spočatkom filmowanja dźě su kamerownicy Serbow přewodźeli. Tak dokumentowachu jich rěč a tradicije kaž tež towaršnostne a politiske podawki. Wulki serbski hrajny film dotal přiwšěm hišće žadyn njeek­sistuje – čehodla pak nic?

Přepytujemy cineastiske wopyty zańdźenosće, sćěhujemy aktiwity syće němsko-serbskich łužiskich filmowcow, kotřiž paruja zajim zjawnosće na serbskich produkcijach, a rěčimy z filmowcami wo špatnych wuměnjenjach za zwoprawdźenje projektow.

Łužycu wusyła RBB jutře, 21. nowembra, w 13.40 hodź. Wospjetowanje budźe 25. nowembra w 3.20 hodź. Magacin hodźi so nimo toho kóždy čas w mediatece RBB wobhladać.

Budyšin. Aktualne wuwiće koronoweje pandemije budźe jedna z temow přichodneho hornjoserbskeho telewizij­ne­ho ma­gacina Wuhladko jutře w 11.45 hodź. na sćelaku MDR. Mjez druhim rozprawjeja wo tym, zo dyrbjachu w katolskich Serbach wjacori duchowni do karanteny a njemóžachu tuž žane kemše swjećić. Tež tradicionalne žohnowanje rowow na Wšěch swjatych bu zdźěla přestorčene. Zarjadniski zwjazk Při Klóšterskej wodźe dyrbješe karanteny wjacorych sobudźěłaćerjow dla swój dom w Pančicach-Kukowje nachwilnje zawrěć. Dale rozprawjeja wo žnjach kukuricy minjene dny na hornjołužiskich polach. Dobra składnosć to so prašeć, kak spokojom młodźi serbscy ratarjo ze swojimi žnjemi su. Wšako su lětsa na swojich polach zdźěla eksperimentowali. A skónčnje před­staja we wusyłanju serbsku koparsku sudnicu Leju Krječmarjec z Wulkeho Wjelkowa. Wona je nětko samo sudnica w zwjazkowej lize žonow B-młodźiny.

Budyšin. 30. róčnica zjednoćenja Němskeje budźe jedna z temow přichodneho hornjoserbskeho telewizijneho ma­ga­ci­na Wuhladko jutře, sobotu, w 11.45 hodź. na sćelaku MDR. 3. oktobra 1990 skónči so wobstaće NDR a Němska bě zaso­ jedyn stat. W Berlinje swjećachu staty­sacy znowazjednoćenje Němskeje, mjez nimi tež někotři Serbja z Łužicy. Wuhladko dopo­mina na historiski wokomik před 30 lětami kaž tež na wichorojte lěto 1990. Dale rozprawjeja wo wjesnym towar­stwje Domizna. Wone je lětsa znowa wubědźowanje wo najrjeńšu žnjowu krónu Sakskeje dobyło. Nimo toho předstaja Chrystu Meškankowu, lawreatku lětu­šeho Myta Zejlerja, kotrež hód­noći jeje čas žiwjenja trajacy angažement za serbsku rěč. Chrysta Meškankowa na­zor­nje pokazuje, kak samozrozumliwje hodźi so serbšćina w kulturje a wědomosći, w cyrkwinskim žiwjenju a swójbje pěstować. Wuhladko wospjetuja tohorunja jutře, sobotu, w 13.30 hodź. w telewiziji RBB a póndźelu, 12. oktobra, w 6.10 hodź. w sćelaku MDR.

Choćebuz (SN). Kaž kóždu třeću sobotu měsaca wusyłaja jutře, 19. septembra, w 13.25 hodź. w telewiziji RBB delnjoserbski magacin Łužyca. Tónkróć wita moderator wusyłanja Christian Matthée přihladowarjow z Janšojskeho Serbsko-němskeho domizniskeho muzeja. Wšako wěnuja so w přinošku k lětušim muzejowym nocam Łužiskeho muzejoweho kraja. Nimo Choćebuskeho Serbskeho domu předstaja w magacinje kapału ­Kula Bula. Hudźbnicy wokoło spěwarja ­Geralda Schöna zamóža připosłucharjow přeco zaso zahorjeć a k sobuplacanju ­pohnuwać.