Aus der aktuellen Ausgabe vom Dienstag, 15 August 2017

USA a Sewjerna Koreja sej dale mjezsobnje hroža

Berlin (dpa/SN). Zwjazkowy wonkowny minister Sigmar Gabriel (SPD) nowe hroženja prezidenta USA Donalda Trumpa přećiwo Sewjernej Koreji raznje zasudźa a warnuje před hrožacej wójnu. Donald Trump wužiwa w konflikće „njesměrnu wójnsku retoriku“. Wobsteji wulki strach, zo so tajka eskalacija z drastiskej rěču započina a z wojerskim zasadźenjom kónči, rjekny němski wicekancler nowinarjam w Kölnje. Europa wšak ma z tajkim strachom swoje nazhonjenja, Sigmar Gabriel­ potwjerdźi. „Před sto lětami smy z wójnskej retoriku kaž spicy do Prěnjeje swětoweje wójny maršěrowali. Z toho smy w Europje wuknyli. Nětko je hodźina diplomatow a nic wójnskeje bjakańcy“, wón rjekny.­

Přiznawam, zo je moja zahoritosć za stare traktory chětro wobmjezowana. Na wulkim zetkanju lubowarjow tychle mašinow minjeny kónc tydźenja w Koblicach pola Wulkich Ždźarow pak sym so tež ja trochu natyknyć dała. Bubotanje z kóždeho róžka, „wóń“ wolija, błyšćate woči muži, jako woni hordźe po swjedźenišću jědźechu – to wšo wučinja wosebity flair tohole zetkanja traktorow, kotrež dale a wjace wopytowarjow přiwabja. Najskerje je to nutřkowna žadosć za tym so z jednorej techniku zaběrać, kotruž hišće sam wobknježiš bjez toho, zo dyrbiš kompjuterowy fachowc być. Naš swět je mjeztym tak technizowany a digitalizowany, zo je to mnohim přewjele. Wróćo k jednorosći – znajmjeńša na wěsty čas – je takrjec hesło. Za to je połsta a wjace lět stary fungowacy traktor runje to prawe. Kotra mašina z dźensnišich dnjow drje tule starobu docpěje? Bianka Wjeńcyna

Budyšin (CS/SN). Srjedź měrca započe­štaj Sofija Delanec a Benno Auras jako streetworkeraj na dróhach Budyšina dźěłać. Minjeny tydźeń staj wonaj w swojim domicilu w załožbowym domje na Wonkownej Lawskej w Budyšinje prěnju zjawnu bilancu skutkowanja sćahnyłoj. A ta bě přewažnje pozitiwna.