Aus der aktuellen Ausgabe vom Donnerstag, 16 August 2018

Budyšin (CS/SN). Po tym zo běchu wot lěta 1988 hač do 1993 běhanske zarjadowanja jako předchadnik Budyskeho měšćanskeho běha při spjatym jězoru přewjedli, přepołožichu sportowe zarjadowanje 1994 do nutřkowneho města. Sobotu, 8. septembra, wotměje so nětko jubilejny 25. běh. Sportowej towarstwje BLV Čerwjeno-běli 90 a MSV 04 wubědźowanje wuhotujetej. Při tym njesteja spěšne časy w srjedźišću, ale prěnjorjadnje wjeselo na pohibowanju.

Hórnikečanski jězor wot lěta 2014 saněruja – Towarstwo Rebelojo Hórnikečanskeho jězora wojuje wo spěšne wožiwjenje

Hač do lěta 2021 wostanje Hórnike­čanski jězor zawrjeny. Přičina su saněrowanske dźěła Łužiskeje a srjedźoněmskeje towaršnosće hórnistwoweho zarjadnistwa (LMBV). Towarstwo Rebelojo Hórnikečanskeho jězora wojuje wo woló­ženja a wo bórzomne znowawožiwjenje jězora. Wo wudobyćach, dalšich zaměrach a předewzaćach je so Andreas Kirschke z předsydu Rebelow Wernerom Petrickom rozmołwjał.

Wjacore lěta hižo zasadźeće so za to, dźěl južneho přibrjoha wot měrca do septembra za kupanje spřistupnić. Što sće dotal docpěli?

W. Petrick: Bohužel ničo. Kóžde lěto stajamy próstwu Sakskemu wyšemu hór­nistwowemu zarjadej. W zhromadnym wuradźowanju z nim, z LMBV kaž tež ze sakskim hospodarskim ministerstwom 23. junija 2016 běchu nam při­powědźili, zo chcedźa Wulkoždźarow­ski přibrjóh klětu za kupanje wotewrěć. Hač k tomu dóńdźe, wotwisuje wot toho, hač fachowcy wyšeho hórnistwoweho zarjada nowe dopóznaća geotechniki akcep­tuja a zwoprawdźa.

Na Sprjewinej dróze mjez Hamorom a Mułkecami pisaja nowy kapitl sta­wiznow hórnistwa. To je trjeba, dokelž ma LMBV tam nowe wěstotne směrnicy zaručić.

Łužiska a srjedźoněmska towaršnosć hórnistwoweho zarjadnistwa (LMBV) dohladuje na kromje Wochožanskeje jamy mnohe stare filtrowe studnje. Wone nastachu spočatk 1960tych lět, zo by­chu dnownu wodu wotklumpali, doniž ­nje­započachu 1966 w jamje bru­nicu wudo­bywać. Tajke stare filtrowe studnje maš tež we wobłuku wokrjesneje dróhi K 8481, tak mjenowaneje Sprjewineje dróhi. LMBV je jako nadawkar a pro­jektny nošer zamołwita za to, zo stare studnje zawěsći.

Po dołhosći 2,5 kilometrow direktnje pod Sprjewinej dróhu a jeje nakromnymi pasmami je 120 tajkich studnjow. Prěnjotne za­wrjenje kolesowarskeje šćežki pódla dróhi su zaso zběhnyli, dokelž wopokaza so jako njetrjebawše. Kolesowarjo pak měli kedźbliwje po twarskim wobłuku jězdźić a w datym padźe wěstotne pokiwy personala na twarnišću sćěhować.

Zamołwići Radija Satkula za finale bičwolejbuloweje tury 2018 su zdźělili, zo je přizjewjenska lisćina za kónčny turněr w Miłoćicach dospołna. Dalše zajimo­wane cyłki pak smědźa so přiwšěm přizjewić a so na wupad přizjewjeneho mustwa­ nadźijeć.

Zašłu póndźelu su bičturu Satkule w Budyšinje skónčili. Poslednja stacija bě zdobom premjera: Prěni króć wu­­bě­dźo­wachu so w Sprjewinej kupjeli. Ra­dijo Satkula a młodźinske kluby běchu turu 25. junija w Radworju zahajili. Na dalšich stacijach běchu Satkularjo w Hórkach, Jaseń­cy, Konjecach, Njebjel­čicach, Pančicach a Nuknicy. W Miło­ćicach zetkaja so cyłki póndźelu, 27. awgusta, w 17 hodź. při Bobkec jěchanskej hali.

Tole su přizjewjene mustwa: 1. CTP – Crew, 2. Sorabija Lipsk, 3. Ječmjeń Jaseńca, 4. Bozanki, 5. Nuknica, 6. Bjarnat Krawc Drježdźany, 7. Mixery, 8. Róžant, 9. Handicap, 10. Black Birds, 11. Škit Budy­šin, 12. Mišmaš, 13. Dwójna nula, 14. Safran, 15. Wučerjo, 16. Zornowc Hórki, 17. FC Pumpel, 18. Satkula, 19. Dwójna nula II, 20. Volker Racho Jurij Bjeńš

Kapitan FCE Marc Stein

Foto:

Georg Zielonkowski

Würzburger Kickers

– FC Energija Choćebuz 3:1 (2:0)

FC Energija Choćebuz

– Unterhaching 2:2 (0:1)

Zestawa hosći: Spahić – Starcew (87. Geisler), Stein, Matuwila, Schlüter, Stanese, Weidlich, de Freitas (46. Mamba), Vite­ritti, Geisler (66. Graudenz), Scheidhauer (79. Gehrmann)

Po prěnjej poražce su so koparjo FC Energije Choćebuz w tabulce 3. ligi wot prěnjeho na 5. městno sunyli. Přičina toho­ wšak bě jich dezolatny wukon. Trenar Claus-Dieter Wollitz bě formaciju trochu změnił. Za Tima Kruse, kiž po­brachowaše amploweje karty dla, hraješe Daniel Stanese, a Streli Mamba sedźeše najprjedy raz na ławce. Sčasom bě jasne, zo dóstanje dotal posledni tabulki, kiž bě hišće bjez dypka, wulku šansu na tři ličaki. Hižo do połčasa Würzburgscy kicke­rojo 2:0 (28., 44.) nawjedowachu.

Jako so jim w 65. min. samo 3:0 po­ra­dźi, bě partija tak derje kaž rozsudźena. Mambje poradźichu so jenož hišće čestne wrota w 89. min. Wjac pak za FCE w Flyeralarm-arenje před 5 089 přihla­do­warjemi móžno njebě.