Aus der aktuellen Ausgabe vom Montag, 15 Oktober 2018

Syły ludźi žnjowy dźakny swjedźeń w Koćinje wopytało

Koćina (aha/SN). Rjane nazymske wjedro a mjeztym jara woblubowany žnjowy dźakny swjedźeń, kotryž je Koćinski zawod Krabatowy mlokowy swět na ini­cia­tiwu jednaćela Tobiasa Kockerta dźewjety raz do Kulowskeje kermuše wuhotował, je sobotu zaso syły ludźi přiwabił. Wulkej płoninje běštej zaparkowanej z awtami tež ze zdalenišich kónčin Sakskeje a Braniborskeje. Perfektna organizacija z mnohimi pomocnikami zaruči, zo njeje k žanym ćežam dóšło. Wopytowarjow witachu tohorunja ze serbskim napisom pod žnjowej krónu.

Běła Woda (SN/MWj). Kak wunošne móže koděrowanje kolesow być, je policija nětko w Běłej Wodźe wobkrućene dóstała. Tam móžeše wona 36lětnemu mužej groćaneho konika wróćić, kotryž bu jemu něšto dnjow do toho pokradnjeny. Kedźbliwi wobydlerjo běchu policistow w Mužakowje na to skedźbnili, zo blisko Nysy samelutke koleso steji. A w bliskosći njebě nichtó, kotremuž móhło wone słušeć. Zastoj­nicy přepruwowachu najprjedy ramikowe čisło, pod kotrymž pak koleso jako­ pokradnjene přizjewjene njebě. Dokelž mějachu woni njedobre začuće, zwě­sći­chu z kombinaciju ličbow a pismikow kolesoweho koděrowanja muža, kiž bě slě­bro-čerwjene koleso znački Giant ně­hdy registrować dał. Tón pak zdźěli, zo je je mjeztym w Běłej Wodźe dale předał. Tuž policisća tež noweho wobsedźerja wo­pytachu. 36lětny swoje koleso spózna a rjekny, zo bě je něchtó pokradnył. Poli­ciji wón to hišće zdźělił njeje.

Při wulkotnym babylěćnym wjedrje bě wčera tež nazymski swjedźeń na rybarskim dworje w Małym Holešowje pola Njeswačidła jara derje wopytany. Sobudźěłaćerjo a pomocnicy Njeswačanskeje přirodoškitneje stacije poskićachu tam nimo čerst­weje a kurjeneje ryby samo čerstwy pječeny chlěb. Požadane běchu tohorunja wše­lake­ družiny marmelady, měd a konjace kołbaski. Mjeztym zo móžachu starši při słódnej kapce pobjesadować, pječechu sej dźěći ćěsto na kiju. Woblubowane zarjadowanje za cyłu swójbu skulojćichu wčera z klankodźiwadłowym předstajenjom. Foto: Feliks Haza

ST Mały Wosyk

– ST Marijina hwězda 0:8 (0:3)

Zestawa hosći: Schmidt – Wróbl, Škoda, Rab, R. Cyž (58. Jurš), Peschmann, Pjetaš (65. Bělk), Hawš, Ch. Cyž, Zelnak (56. Eldor), Pakoßnick

Na wosmym hrajnym dnju wokrjes­neje koparskeje ligi wotmě so skónčnje dołho wočakowany němsko-serbski derby susodow. ST Marijina hwězda wšak bě wulki faworit. Wot prěnjeje hač do poslednjeje mjeńšiny wona w tej róli tež wosta a je přećiwo underdogej jasnje doby­ła. Prěnje wrota we 8. min. dźěchu na konto Oskara Hawša. 0:2 (15.) bě Feliks Pjetaš cyle jednorje raz ze zdalenosće 16 metrow na wrota třělił. Bul dótkny so wjacore razy zemje a prasny wot nutřkowneje žerdźe do saka. Spěšna a direktna hra hosći wobradźeše koparjam z Małeho Wosyka wulke problemy. Nimale kóždu mjeńšinu mějachu Pančičenjo šansu na 3:0. Zwrěšćichu pak na swójskej lochkomyslnosći abo na jara derje dźeržacym wrotarju domjacych Dominiku Andersu. Ale hišće do połčasa třěli Jakob Pakoßnick 0:3 (39.), a to po jara dobrej přihrawce Pjetaša.

Serbska triatletka Beata Čórlichec z Kölna je w nocy na njedźelu swój wosobinski rekord na najćešim triatlonje swěta­ na kupje Hawaii polěpšiła. Rodźena Němčanka přeprěči cilowu liniju po 3,8 km we wodźe, 180 km na kolesu a ma­rathonje 42,195 kilometrow po dźesać hodźinach a 27 minutach. Beata Čórlichec bě so hižo štwórty raz na Ironmanje Hawaii wobdźěliła. Foto: Jana Wersch

Prěni wólnočasny wolejbulowy turněr serije „Top šěsć“ skónči so w Radworju z dobyćom mustwa 12/96 před ST 1922 Radworjom a wučerjemi Serbskeho gymnazija.

Kaž loni skónči so prěni tradicionalny wolejbulowy turněr wólnočasnych mustwow tónraz znowa ze snadnym dobyćom abiturientow Serbskeho gymnazija Budyšin (SGB) z lěta 1996. Mustwo 12/96 přesadźi so snadnje z lěpšej diferencu dźewjeć małkich dypkow před hosćićelom ST 1922 Ra­dwor.

Cyłkownje bě sej pjeć mustwow do Radworskeje „Slavije“ dojěło, zo bychu po dwójce sydom mjeńšinach hrajneho časa dobyćerja zwěsćili. Škoda, zo nje­móžeštej so zastupnistwje z Worklec a Chrósćic pobrachowacych hrajerjow dla wobdźělić. Třeće městno zawěsćichu sej wučerjo SGB, kotřiž běchu bjez třoch nadběhowarjow (Čižank, Bogusz, Friedrich) nastupili. Tak falowachu tež jim sylni blo­kowarjo. Kaž finalna partija skónči so hra wo městno štyri z nje­roz­sudnym wuslědkom. Mustwo chóra Meja přesadźi so w prěnjej sadźbje přećiwo Žołto-módrym Kulow ze 14:11, woteda pak druhi přechod z 10:13. Na kóncu mě­ja­chu Radworčenjo jednu dobytu sadźbu wjace na konće, a to z třomi hrajerkami.

HZ Łaz/Běły Chołmc

– SJ Chrósćicy II 6:0 (4:0)

Zestawa hosći: Cyž – Dórnik, Mark, Bětnar, Lešawa, L. Zahrodnik (71. M. Donat), Wowčer (46. Špitank), G. Zahrodnik, Šołta, Liznar (71. Šmit), J. Donat

Erfurt (B/SN). Ministerski prezident Durinskeje Bodo Ramelow (Lěwica) widźi zakaz nahłowneho rubiška muslimkow jako wěc, kotraž dale njewjedźe. Wón sam měni, „zo měli ludźo swoje mjez­wočo pokazać“, ale powšitkowny zakaz rubiška by potom tež płaćił za katolske rjadnicy, praji politikar. Před zakonjom njehodźi so mjez swobodu a nanuzowanjom rubiška rozeznawać.

85lětny so z křesćanom stał

Brisbane (B/SN). Za wěru njejsy ženje přestary: Lětdźesatki bě Bill Hayden jedyn z najprominentnišich ateistow Awstralskeje – nětko je so wón z 85 lětami z křesćanom stał. Něhdyši wonkowny minister da so 9. septembra w katolskej cyrkwi swj. Marije w Ipswichu pola Brisbanea wukřćić. Dlěši čas hižo so wón sam sebje prašeše za swojej rólu w žiwjenju, rjekny něhdyši předsyda social­demokratiskeje strony Labor Party cyrkwinskej nowinje Catholic Leader. Poli­ti­kar, kotrehož bě před štyrjomi lětami Boža ručka zajała a kotruž bě wón přežiwił, so nadźija, zo jeho přistup ke křesćanskej wěrje tež druhich k tomu zmuži.

Cyrkwinski dźeń bjez AfD