Aus der aktuellen Ausgabe vom Montag, 17 Dezember 2018

Radwor (SN/mwe). Třeći króć wotměchu w Radworju sobotu nawječor před hosćencom „Meja“ małe dohodowne wiki. Wot wjesnjanow derje přiwzate a tež mjez wobydlerjemi z wokoliny woblubowane zarjadowanje organizuje mějićelka cateringoweho předewzaća a wotnajerka „Meje“ Katleń Wawrikowa.

Jako wosebitosć su hosćom na sobotnych wikach zaso wšelake chłóšćenki poskićeli. Nimo bozankoweje poliwki a sadu ze šokolodu wobdatym abo wosebitych twarohowych kulkow běchu to pražene kołbaski po „Wawrikec“ recepće. Rěznik z Budyšina bě kołbaski „tykał“. Zboka małeho swjedźenišća, hdźež běchu tež tepjenske hriby nastajili, poka­zowachu filmy, tak nimo krótkeho dźě­ćaceho filma pask „Radworski powě­trowy portret“ abo klasikar „Die Feuerzangenbowle“. „Sym z dohodownymi wikami spokojom, wjedro je wudźeržało, Ra­dworčenjo su spontanje přichadźeli a su při wšelakich družinach horceho wina rjenje a lóštnje bjesadowali“, Katleń Wawrikowa rozprawja. Tež lětsa móžeše hósć wikow w loteriji žiwu husycu dobyć. Tónkróć bě to Radworčan Maćij Žur.

Wobwodna liga – wolejbul žony

MB Wojerecy  8 24 : 11 20

CVJM Zhorjelc 8 22 : 10 18

TSV Kundraćicy  8 18 : 12 15

JTVG Koblicy  8 17 : 16 14

OSC Lubij  8 15 : 13 13

Ochranowske wolejfantki 8 15 : 16 12

ST Kupoj-Nowa Łuka  8 13 : 20 8

HZ Pančicy-Worklecy 8 10 : 21 5

VV Žitawa 09 II 8 8 : 23 3

TSV Kundraćicy – HZ Pančicy-Worklecy 3:0 (27:25, 25:19, 25:16)

Wolejbulistki Hrajneho zjednoćenstwa Pančicy-Worklecy su swoju poslednju winowatostnu hru 2018 w Habrachćicach (Ebersbach) přećiwo šestemu z Kundraćic (Cunnersdorf) přewjedli.

Prěnja sadźba so za hwězdźički/micki derje započa. Po krótkim času nawjedowachu wone z pjeć dypkami a móžachu to hač k stawej 20:24 dźeržeć. Jara spěšnje pak wopušći je koncentracija, a mjezywuslědk změni so na 26:25 za hosćićelki z Kundraćic. W rozsudnej hrajnej scenje dźěše posledni dypk prěnjeje sadźby po njezbožownym rozsudźe sudnicy na TSV, a sadźba skónči so ze 27:25 za přećiwnika.

W slědowacymaj přechodomaj nje­bě­chu žony hrajneho zjednoćenstwa hižo­ koncentrowane a česćelakome dosć. Najebać to widźachu přihladowarjo spodobne boje při saku. Wobě sadźbje pak dźě­štej z 25:19 a 25:16 zasłužbnje na konto hosćićelkow.

Kónčny staw adwentneho turněra:

1. mustwo 12. lětnika  8 dypkow

2. mustwo 11. lětnika  6 dypkow

3. wučerki/wučerjo  4 dypki

4. mustwo 10. lětnika  2 dypkaj

5. měšane mustwo  0 dypkow

Na adwentnym wolejbulowym turněrje Serbskeho gymnazija Budyšin (SGB) přesadźichu so mikswolejbulisća 12. lětnika suwerenje přećiwo dalšim štyrjom cyłkam a zakitowachu tak doby­će minjeneho lěta.

Rjana tradicija na Budyskim Serbskim gymnaziju je, zo wubědźuja so šulerjo a wučerjo mjez sobu na wšelakich wolejbulowych turněrach. Minjeny pjatk přeprosy rumpodich w postawje sportoweho wučerja Měrka Korjeńka štyri šulerske a wučerske mustwo na 7. adwentny wolejbulowy turněr w tamnišej sportowni. Zajim bě jara wulki, wšako so wjace hač 20 šulerjow 10. do 12. lětnika prawi­dłownje na popołdnišej AG wobdźěla. Tak běštej dobra nalada a wjeselo při hraću wot spočatka zaručenej. Wosebitosć turněra leži w zestawje jednotliwych cyłkow, wšako dyrbja stajnje tři holcy resp. tři wučerki na hrajnišću stać.

Awtorka dźensa

Halena Jancyna

VFR Aalen

– FC Energija Choćebuz 3:3 (1:1)

Zestawa hosći: Spahić – Weidlich, Stein, Matuwila, Bender, Holthaus, Gehrmann, Viteritti (78. Beyazit), Geisler (61. Zimmer), Scheidhauer (61. Rangelow), Mamba

Dyrbimy koparjow FC Energije Cho­ćebuz hladajo na moralku chwalić abo je pře­co zaso nastawacych zmylkow dla kritizować? Na wobě prašeni rěka wotmołwa haj. Při pinčnym duelu třećeje ligi prezentowachu woni w Aalenje po započatkarskich zmylkach domjacemu mustwu wrota na tableće (13., 48., 67.). Jenož derje pak, zo bě moralka w porjadku a zo su so trójce ze zastatka wuswobodźili. Tak na přikład, jako trjechi Streli Mamba k 1:1 (24.). Do toho bě Torbenej Rehfeldej bul při šěsnatce wotewzał. Dalše wrota poradźichu so 22lětnemu w 65. min., jako wón hrajny nastroj do kuta třěli. Třeće nawjedowanje pak přewostajichu koparjo Energije VFR Aalenej w 67. min. Tak trjebachu hosćo tójšto zboža, jako z poslednim spjećowanjom dwě sekundźe do wothwizdanja přez Dimitara Rangelowowy hłójčkowany bul znajmjeńša hišće minimalny cil docpěchu. Georg Zielonkowski

Dalšej hrě FC Energije

22.12. 14:00 FC Hansa Rostock –

  FC Energija Choćebuz

Berlin (B/SN). Po 1 600 kilometrach puća za lěpšu klimu su putnicy w zwjazkowym hospodarskim ministerstwje w Ber­linje lisćinu žadanjow statnemu sekretarej Ulrichej Nussbaumej přepodali. Wón je so z putnikami intensiwnje rozmołwjał a pokaza so wotewrjeny nastupajo temu klimowa sprawnosć, měnjo: „Mje njetrjebaće přeswědčić.“ W septembru bě so klimowy putniski puć, organizowany wot wobeju wulkeju cyrkwjow, w Bonnje zahajił. Wot toho časa bě po wotrězkach 1 500 putnikow po puću. Dale wjedźeše puć přez Pólsku do Katowic, hdźež wotmě so hač do 14. decembra swětowa klimowa konferenca.

Prěni raz žónska na čole

Berlin (B/SN). Zwjazkowa zhromadźizna Pomocneho skutka kolpingow w Kölnje je Ursulu Groden-Kranich za nowu předsydku 1850 załoženeho katolskeho zwjazka wuzwoliła. Zapósłanča CDU je wučena bankownica. Jeje centralne temy w zwjazkowej politice su eu­rop­ska a swójbna kaž tež kulturna a medijowa politika. 53lětna nastupi zastojnstwo po Thomas Dörflingeru, kiž njebě po 14 lětach hižo jako předsyda kandidował. Pomoc­ny skutk kolpingow w Němskej ma 230 000 sobustawow.

Pater Rupert Mayer