Aus der aktuellen Ausgabe vom Donnerstag, 21 Februar 2019

Digitalny pakt přińdźe

Drježdźany. Sakski kultusowy minister Christian Piwarz (CDU) wita dojednanje mjez Zwjazkom a krajemi, tak mjenowany digitalny pakt. „Je to dobra powěsć našim šulam“, Piwarz dźensa rjekny. Sakska ma za wutwar IT-infrastruktury na kubłanišćach něhdźe 250 milionow eurow dóstać. We wadźeńcy wo spěchowanje wu­twara su so Zwjazk a kraje wčera na změnu Zakładneho zakonja a na wurjadne rjadowanja dojednali.

Wusud wo wólbnym prawje

Karlsruhe. Zwjazkowe wustawowe sudnistwo je dźensa wusud wozjewiło, w kotrymž wobmjezowanje wólbneho prawa za zbrašenych jako wustawje njewotpowědowace wotpokazuje. Tež po sudniskim wukazu psychiatrisce zastarani jeći njesmědźa so „z demokratiskeho procesa wuzamknyć“, w spisu dale rěka.

Chinsku medicinu zběhnu

Profesionalni hrajerjo NSLDź wuleća sej do zašłosće, dorost do Orienta

Budyšin (SN/bn). Němsko-Serbske ludowe dźiwadło w Budyšinje hotuje so na přichodnej hornjoserbskej premjerje. Profesionalni hrajerjo probuja tuchwilu za prapremjeru inscenacije „Wopušćeny dom“. Ekspozej krucha z pjera Carle Niewöhner bu we wobłuku wubědźowanja ŁUŽICA 2017 ze spěchowanskim mytom wuznamjenjeny. Loni je w Kölnje skutkowaca awtorka, režiserka a dźiwadłowa wědomostnica kruch dopisała. Lubina Hajduk-Veljkovićowa předłohu zeserbšći. Režiju wukonja rodźena Choćebužanka Esther Undisz jako hósć. Nimo nimale cyłeho serbskeho ansambla NSLDź hrajetej dalšej hosćej sobu. Wjelelětna dźiwadźelnica domu Majka Kowarjec so runje tak na Budyske jewišćo wróći kaž bywša elewka činohrajneho studija institucije Julija Klingnerec.

Drježdźany/Budyšin (SN/JaW). Druhe połlěto 2018/2019 zahaja na sakskich šulach z něhdźe 670 nowowob­sadźenymi wučerskimi městnami. Přiwšěm wučerjo we wšěch šulskich družinach dale pobrachuja. Wo tym informuje medijowy rěčnik sakskeho kultusoweho ministerstwa Dirk Reelfs w nowinskej zdźělence. „Štyri razy wob lěto swobodne městna na kubłanišćach wupisujemy. Terminaj 1. nowember a 1. meja stej při tym skerje na přidružnikow wu­směrje­nej, k 1. februarej a 1. awgustej pytamy wukubłanych pedagogow“, rozłožuje nowinski rěčnik Reelfs.

Předsydstwo Budyskeje župy je so spočatk tydźenja prěni raz po hłownej a wólbnej zhromadźiznje schadźowało a mjez druhim ju a dalše zarjadowanja wuhódnoćiło.

Budyšin (LTh/SN). Budyska župa „Jan Arnošt­ Smoler“ dźěła najprjedy raz bjez župana a městožupana. Na to su so čłonojo předsydstwa na swojim prěnim schadźowanju po hłownej wólbnej zhromadźiznje wutoru w Budyskim Serbskim domje dojednali. Zdobom dorěčachu sej mjezsobnu pomoc a podpěru, zo njebychu so gremijej wobsahi a naroki zhubili.

Hišće raz rozjimali a jasnje potwjerdźili su čłonojo župneho předsydstwa wotpowědnje stejišću na hłownej zhromadźiznje swoju zwólniwosć, na nowym koncepće nastupajo wužiwanje Budyskeho Serbskeho dom sobu dźěłać. „Chcemy wosebje na to dźiwać, zo wostanje dom, kaž bu při jeho přepodaću do serbskich rukow 1999 pisomnje zakótwjene‚ kulturnopolitiske srjedźišćo Serbow‘“, předsydstwo župy k tomu potwjerdźi.

Kulow (SN/BŠe). Sobudźěłaćerjo Kulowskeje mebloweje twornje Maja ćišć na nawodnistwo předewzaća zesylnjeja. Wčera su so krótkodobnje k protestnemu zarjadowanju před stejnišćom zhromadźili, zo bychu na połoženje skedźbnili. Krótkodobnje bě dźěłodawar mjenujcy jednanje wo zwoprawdźenju tarifoweho zrěčenja wotprajił. Poprawom wšak měješe dźěłarnistwo IG metal hišće nadźiju na konstruktiwne zhromadne dźěło. To pak so z wčerawšim wotprajenjom změni. „Jednostronski rozsud dźěłodawarja, termin krótkodobnje wotprajić, je hladajo na jednanje napřećo kolegam njesprawne. Wuchadźamy nětko z toho, zo předewzaće tamnej dwaj dojednanej terminaj dodźerži“, wuzběhny prěni społnomócnjeny dźěłarnistwa IG metal za wuchodnu Saksku Jan Otto. „Hewak móhł so z protestneho zarjadowanja tež spěšnje warnowanski stawk wuwić.“

Rom (dpa/SN). Kardinal Reinhard Marx nadźija so z dźensa we Vatikanje zahajeneho wjerška přećiwo znjewužiwanju nowych impulsow za cyrkej a runje tak za cyłu towaršnosć. „Zaměr ma być, zo wšitcy biskopja wužadanja spóznaja, kotrež dyrbimy zmištrować“, rjekny předsyda Němskeje biskopskeje konferency dźensa w Romje. Marx je jedyn ze 110 šefow biskopskich konferencow swěta, kotřiž hač do njedźele z bamžom na histo­riskim wjeršku wuradźuja.

May jedna znowa z Junckerom

Brüssel (dpa/SN). Premierministerka Wulkeje Britaniskeje Theresa May je so wčera wječor znowa do Brüssela podała, zo by z prezidentom komisije EU Jeanom-Claudeom Junckerom znowa wo brexiće jednała. Wobě stronje pak zjawnje dale na swojim stejišću wobstawatej. Mjeztym tež Juncker dalše přesunjenje brexita cyle njewuzamkuje. Wulka Britaniska chce 29. měrca EU wopušćić. Dojednane zrěčenje ze 27 statami EU pak wjetšina britiskeho knježerstwa wotpokazuje.

Namórnistwo trjeba płachtak

Kedźbu, hdyž sej knihu kupiće! Žona bě sej w interneće roman wo rjekach kupiła, zo móhła ju w dowolu woměrje čitać. Na lětanišću pak bu njejapcy zadźeržana. Roentgenowa připrawa pokaza, zo bě w knize pistola schowana. Wustróžana 59lětna powědaše, zo ničo wo „strašnym wobsahu“ njewě. Na zbožo jej to policija wěrješe, a tak móžeše swój zasłuženy dowol nastupić, wězo bjez pistole.

Wjetši kašć za tołše ćěło woznamjenja wjace pjenjez za pohrjeb. Tak mjenowany wosebity popłatk za wjetše kašće chcedźa w nowoseelandskim Hastingsu přesadźić. Normalnje pali so kašć z ćěłom dwě a poł hodźinje, ekstra wulki porno tomu hač do pjeć a poł hodźiny. Za nje dyrbja tuž 121 eurow připłaćić.

Drježdźany (SN/BŠe). Kak elektrifikaciju železniskeje čary mjez Drježdźanami a Zhorjelcom­ financować, je dale njejasne. Wo tym informuje zapósłanc zwjazkoweho sejma Torsten Herbst (FDP), kiž je zwjazkowemu knježerstwu małe naprašowanje stajił a so wo połoženju wobhonił. „Hdy skónčnje elektrifikowany zwisk změjemy, je dale wotewrjene. Tak dyrbimy hišće hač do kónca lěta wočaknyć, hač projekt hódnoćenske kriterije programa zwjazkoweho knježerstwa za elektrifikaciju spjelnja“, zapósłanc wu­zběhnje. Cyłkowne kóšty projekta wučinjeja 500 milionow eurow. Suma, kotruž je knježerstwo za program přewostajiło, je pjeć milionow eurow. „To ani za kilometer njedosaha“, je Torsten Herbst přeswědčeny.

Kijew (ČŽ/K/SN). Pjeć lět po namócnosćach na Kijewskim Naměsće njewotwisnosće ze stami mortwych njejsu přeco hišće wšitcy winicy znaći. To zwurazni nawoda přepytowaceho organa generalneho statneho rěčnistwa Sergij Horbatuk. Sudnistwam předleži něhdźe 300 wobskóržbow, zasudźili pak su dotal jenož dźewjeć wosobow.