ST Załom

– ST 1922 Radwor 2:3 (1:1)

Zestawa hosći: Wróbl – Zähr, Grubert, Šěrak, Karwin, Šram, Winar, Buša, Wjeńka, Omran, Müller

Kaž hižo w hrě přećiwo Wósporskim koparjam dyrbješe so hóstny trenar Pětr Bejmak zaso tójšto hrajerjow wzdać. Studenća maja tučasnje pruwowanja a pobrachuja. Krótko do tuteje partije bě so tež hišće Stephan Henke zranił, a problem z ličbu hrajerjow so hišće powjetši. Krótkodobnje pak Jens Grubert a Axel Müller z druheho mustwa wupomhaštaj, tak zo móžachu Radworčenjo z jědnaćomi nastupić. Taktisce nastajichu so woni defensiwnišo a spytachu najprjedy nulu dźeržeć.

Domjacy startowachu jara spěšnje do hry. Přeco zaso dyrbještaj Johannes Zähr a Fabian Šěrak nadběham zadźěwać. Hačrunjež hosćićel hru jasnje postajowaše, njewuhra sej móžnosće, kotrež móhli k wrotam wjesć. W 34. min. potom šok za njeho: Z prěnim dobrym nadběhom docpě ST Radwor 0:1. Nico Buša bě Franca Winarja pósłał. Před wrotami suny Winar bul prěki k sobu běžacemu Abdullahej Omranej, kiž njeměješe žane ćeže, bul z krótkeje distancy do saka třělić. Krótko do přestawki Załomjenjo wurunachu (42.).