Hdyž rěči so wo CDU-turněrje we Worklecach, mysli wjetšina fanow serbskeje kopańcy na wone kóždolětne zarjadowanje dźeń do silwestra. To je tamniša sportownja stajnje kopata połna, a wjesne zastupnistwa wojuja na parkeće wo pokal. Z tradiciju pak tohorunja je, zo přewjeduja tam w małym róžku dalši tajki koparski turněr. Město wjesnych wokolnych mustwow wobdźěleja so na nim teamy ze stareho Kamjenskeho wokrjesa a Wojerec. Cyłkownje dźesać cyłkow, mjez druhim z Kamjenca a Ohorna, bě minjenu sobotu do Worklečanskeje sportownje přišło. Ze serbskeje wokoliny nastu­pichu tam Radworčenjo, Worklečenjo a Chróšćenjo kaž tež mustwo Klumpaki.