Jedyn z najsnadnišich a najnapjećišich hrajnych dnjow hišće młodych stawiznow serbskeje beachvolleyballoweje ligi je nimo. W Róžeńće zetkachu so minjeny štwórtk načolne mustwo Smoła/Bjeńš, w tučasnje wurjadnej formje dwójka Šěn/Mět a duwo Wahlicht/Šołta, kotrajž hišće dypkować njemóžeštaj.
W prěnjej hrě wočakowaše načolnik Norberta Wahlichta a Metoda Šołtu. Prěnja sadźba bě cyły čas wurunana. Žane z dweju mustwow njezamó so tak prawje wotsadźić a tak steješe 20:20. Kóždy dypk bě nětko wažny – na kóncu přesadźištaj so Benedikt Smoła/Jurij Bjeńš ze zbožom z 25:23. Druha sadźba bě kopija prěnjeje. Hakle při stawje 17:17 pak so dotalny načolnik ze štyrjomi dypkami wotsadźi a 21:17 doby. Dźewjate dobyće to w dźewjatej hrě.
