Dalši wuměłski objekt w Krabatowym młynje ma hosći přiwabić

Čorny Chołmc (SN/MiR). Čornochołmčanski Krabatowy młyn změje najpozdźišo wot februara 2017 hłownohamtskeho jednaćela. Tole zdźěli na naprašowanje SN předsyda towarstwa Krabatowy młyn Tobias Čižik. Hižo loni bě, kaž SN rozprawjachu, wo tym rěč, termin přistajenja pak dotal jasny njebě. Tobias Čižik zwěsći: „Nadawki na Krabatowym młynje wobstajnje přiběraja, ale tež ličby wopytowarjow. Lětsa bě jich dotal wjace hač 35 000. Poskitki, hač na kulturnym abo muzejopedagogiskim polu, so lěto wob lěto rozšěrjeja. Lětnje Krabatowe swjedźenske dny z jewišćowym spektaklom pod hołym njebjom přistajenych a čłonow towarstwa wosebje wužaduja. Dalši krok k skrućenju cyłeho projekta tuž je, jednaćela přistajić.“ Tuchwilu maja tam šěsć sobudźěłaćerjow, dwě žonje w zarjadniskim wobłuku a štyrjoch přistajenych w gastronomiji.