Koncert duchowneje hudźby bě njedźelu w Budyskej Serbskej cyrkwi prawy zazběh do lětušeho póstneho časa. K tomu běchu sej twórbu wupytali, kotraž so do tohole časa derje hodźi.

Budyšin (CRM/SN). Loni prapremjernje w klóšterskej cyrkwi w Pančicach-Kukowje předstajena twórba „Stabat mater“ Budyskeho cyrkwinskeho hudźbnika Feliksa Brojerja zaklinča prěnju póstnu njedźelu w Budyskej cyrkwi Našeje lubeje knjenje. Běše to derje wopytany koncert. Hudźbne poskitki tajkeho razu su tu woblubowane, a młody Serb je hižo jako inowatiwny komponist wšelakich žanrow a nadarjeny improwizator na pišćelach dosć derje znaty.