Kruch „Za brězami“ serbsku premjeru w NSLDź dožiwił

Budyšin (SN/CoR). „Smy woprawdźe wolóženi, zo je publikum inscenaciju tak derje přiwzał. Dokelž nimamy telko serbskich pospytow w hrajnej dobje, je ćim wažnišo, zo funguje“, rozłoži intendant Budyskeho Němsko-Serbskeho ludoweho dźiwadła Lutz Hillmann sobotu wječor po poradźenym předstajenju krucha „Za brězami“ Olivera Bukowskeho na premjernym swjedźenju.

Kaž hižo w minjenych lětach bě intendant sam tež tónraz přewzał režiju serbskeje hłowneje inscenacije, kotraž dožiwi loni nazymu na Złokomorowskim Nowym jewišću swoju němskorěčnu prapremjeru. Kruch wo łužiskich poměrach generaciju po přewróće bě z Choćebuza pochadźacy awtor w nadawku Złokomorowskeho dźiwadła składnostnje jeho 70lětneho wobstaća spisał.