Druhdy su to prěnje dožiwjenja dźěćatstwa, kotrež so na cyłe žiwjenje wuskutkuja. Tak bě tomu tež pola noweho předsydy Budyskeho wuměłstwoweho towarstwa Gisberta Dahmena-Wassenberga. Wón je wotrostł blisko Lehmbruckoweho muzeja w Duisburgu, wěnowaneho wu­znamnemu tworjacemu wuměłcej Wilhelmej Lehmbruckej (1881–1919). Husto bě so z maćerju w tamnišim parku wulkoskulpturow wuchodźował. „To je hłuboki zaćišć we mni zawostajiło“, praji dźensa 58lětny nan pjeć dźěći.