Přihoty na XII. mjezynarodny folklorny festiwal „Łužica 2017“ derje běža

Chrósćicy (SN/CoR). Dwě předstajeni za šulerjow w Budyskim NSLDź na prěnim dnju XII. mjezynarodneho folklorneho festiwala „Łužica 2017“, wotměwaceho so wot 22. do 25. junija w Budyšinje, Chrósćicach a Hochozy, stej tři tydźenje do zahajenja hižo wupředatej. „To nas překwapja. Zdobom je to znamjo, kak derje je so festiwal minjene 22 lět wuwiwał – je připóznaty a přiwzaty jako wjeršk regiona. Za to tež rěči, zo staj wobaj mi­nisterskaj prezidentaj z Braniborskeje a Sakskeje patronat přewzałoj“, wuzběhny předsyda přihotowanskeho wuběrka Marko Kowar na dźensnišej nowinarskej konferency w Chróšćanskim gmejnskim zarjedźe, na kotruž bě tež wjesnjanosta Marko Kliman wutrobnje witał.