Z čitanjom młodych awtorow literarne wubědźowanje zahajili

Budyšin (SN/CoR). Při najrjeńšim podlětnim wjedrje je wčera wječor nimale 20 ludźi zazběh lětušeho literarneho wubědźowanja jako čitanje pod hesłom „Naš dorost“ w Smolerjec kniharni dožiwiło. Wothladajo wot młodych awtorkow Aleny­ Belkotec, Annamarije Hadankec a Rejzki Delenkoweje, kotrež su zwjetša hižo wozjewjene teksty čitali, njebě bohužel poprawna cilowa skupina, naš potencialny literarny dorost zastupjeny. Woni bychu mjez druhim šansu měli, z hižo nazhonitymaj spisowaćelkomaj Róžu Domašcynej a lětušej lawreatku spěchowanskeho Myta Ćišinskeho Lubinu Hajduk-Veljkovićowej do rozmołwy přińć. Tež wonej słušatej ke kruhej něhdyšich wobdźělnikow wubědźowanja, kiž dźensa serbsku literaturu wobohaća.