Hrajna doba 2016/2017 Budyskeho NSLDź wosebite wjerški měła
Budyšin (SN/CoR). Hišće ženje w stawiznach Budyskeho lětnjeho dźiwadła njeměješe inscenacija telko wopytowarjow kaž lětuša „Olsenowa cwólba wupućuje“. Nimale 40 160 ludźom je mustwo wokoło intendanta, awtora a režisera Němsko-Serbskeho ludoweho dźiwadła Lutza Hillmanna 34 króć druhu stawiznu danskeje padušneje trójki předstajiło, wčera posledni raz. K nowemu rekordej bě tež přinošowała přihladowarska trawersa z nimale dwěsćě městnami wjace hač loni, jako dožiwi nimale 37 000 ludźi 37 předstajenjow. Kaž loni tež lětsa ani jeničke wjedra dla wupadnyło njeje.
