27. Choćebuski filmowy festiwal ze sympozijom wo serbskim filmje

Choćebuz (HA/SN). Delnjołužiska metropola steji před lětušim wjerškom w swojim kulturnym žiwjenju. Hižo 27. raz přewjedźe Choćebuz festiwal wuchodo­europskeho filma (CFF), kotryž je mjeztym najwjetši tejele kategorije po cyłej Europje. Něhdźe 200 přinoškow z 42 krajow cyłeho swěta su programowy direktor festiwala Bernd Buder a jednaćel CFF Andreas Stein kaž tež dalši minjene dwanaće měsacow na wopyće druhich festiwalow a při hinašich přiležnosćach za lětuši­ Choćebuski festiwal wot 7. do 12. nowembra wupytali. Mjez nimi je 85 produkcijow, kiž dožiwja swoju němsku premjeru, a 25, kotrež budu prěni raz zjawnje widźeć.

„Program je wobšěrniši, hač smy sej to do toho předstajili. Wuchodoeuropski film so dale wuwiwa a wostawa jara zajimawy a wabjacy za publikum“, rjekny Bernd Buder tydźenja na nowinarskej konferency. Tak produkuja jeničce w Ruskej něhdźe 120 filmow wob lěto.