NSLDź z hosćićelom 8. zetkanja profesionalnych klankodźiwadłow było
Budyšin (SN/bn). Hosćićel lětušeho 8. zetkanja sakskich klankodźiwadłow bě Budyske Němsko-Serbske ludowe dźiwadło, kotrehož wotpowědna sparta bu před 60 lětami załožena. Tradicionalne zeńdźenje wšitkich profesionalnych klankowych jewišćow w swobodnym staće je „předewšěm dźěłowe schadźowanje, ma pak zdobom zwiski mjez jednotliwymi domami skrućić a nowe impulsy sadźić“, kaž w zdźělence NSLDź rěka. Wobdźěleni běchu nimo Budyskeho jewišća Kamjeničanske figurowe dźiwadło, Lipšćanske Dźiwadło młodeho swěta, Šwikawske (Zwickau) klankodźiwadło, klankowe jewišćo Drježdźanskeho Dźiwadła młodeje generacije a figurowa sparta Radebeulskich Krajnych jewišćow. Hłownej spěchowarjej zarjadowanja běštej wospjet krajny zwjazk Němskeho jewišćoweho towarstwa a Kulturna załožba Sakskeje.
