Budyske NSLDź kónči sezonu z „płakacym kaž tež smějatym wóčkom“

Budyšin (SN/bn). Hrajna doba 2020/2021 Budyskeho Němsko-Serbskeho ludoweho dźiwadła je zakónčena. Dohromady zličichu na 231 zarjadowanjach něhdźe 39 200 wopytowarjow. „Zhladujemy z płakacym kaž tež smějatym wóčkom na tule wosebitu sezonu. Na jednym boku bě deprimowace, zo njemóžachmy korony dla sydom měsacow dołho za publikum hrać. Na tamnym boku je nas wothłós přihladowarjow po nanuzowanej přestawce přewšo pozbudźał. Naprašowanje za dźiwadłom bě wulke a wjeselimy so nad rezonancu nastupajo lětnje dźiwadło kaž tež naše poskitki na dźiwadłowej zahrodźe. To spožča nam zmužitosć za přichodnu hrajnu dobu, kotruž 6. septembra zahajimy.“ To pisa intendant NSLDź Lutz Hillmann w aktualnej zdźělence institucije.