Z dźěłarničku zajimcam rum za kreatiwitu skićić
Budyšin/Lipsk (SN/JBo). Matej Dźisławk z Lipska běše jedyn z dobyćerjow wubědźowanja „Simulplus – čiń sobu“ w kategoriji „Łužica – žiwa dwurěčnosć“. W aprylu je wón w Kamjenicy za swój projekt z mjenom „Studijo Lipsk“ podpěru 10 000 eurow přijimał.
Prěni přinošk we wobłuku projekta Dźisławka je fotowa serija. „Zwjazuju swoju zahoritosć za fotografiju z ideju, serbske elementy z noweje perspektiwy předstajeć móc. Jako předłohi słuža mi swójske wobrazy kaž tež wobrazy z wšelakich mediatekow, na kotrychž jewi so na přikład wosoba w družčej drasće. Z wužiwanjom mnohich barbow a technikow spytam wobraz takrjec na moderne wašnje respektiwnje w ‚nowym swětle‘ prezentować. Zaměr je, na tele wašnje mjez ludźimi zajim za naš lud zbudźić“, rodźeny Haslowčan wuswětla.
