„Sherlock Holmes a Budyska bestija“ wabi z wosebitymi poskitkami

Budyšin (SN/CoR). Dwě lěće njejsu přihladowarjo po zwučenym wašnju Budyske lětnje dźiwadło korony dla dožiwić móhli, lětsa při 26. wudaću pak čaka na lubowarjow spektakla pod hołym njebjom na Budyskim hrodźe zaso cyła kapacita nimale tysac městnow na trawersy. Předstajić chce Němsko-Serbske ludowe dźiwadło wot 23. junija do 31. julija 35 króć stajnje wot srjedy hač do njedźele hru „Sherlock Holmes a Budyska bestija“, z kotrejež su wčera medijam někotre – zwjetša hudźbne – sceny předstajili. Dobry tydźeń do premjery maja hišće šansu, wčerawše zwukowe deficity wotstronić. Hudźba, telko je jasne, tež w pokročowanju lońšeho krucha „Sherlock Holmes a paski Beatlesow“ – znowa spisaneho wot intendanta NSLDź Lutza Hillmanna, kiž tež režiju wjedźe – zaso wažnu rólu hraje. Dokelž pak lětuše jednanje w Budyšinje lěta 1973 hraje, móža so přihladowarjo nimo Beatlesowych hitow wosebje na typiske spěwy tehdyšich wuchodoněmskich protagonistow wjeselić – kaž su to Klaus Renft Combo, Puhdys a Veronika Fischer.