Praha/Budyšin (SN/CoR). Z dobrej bilancu je so Ludowe nakładnistwo Domowina z Praskich knižnych wikow nawróćiło. Wot minjeneho štwórtka hač do njedźele wobdźěleše so tam wjace hač 450 wustajerjow ze 165 stejnišćemi na dohromady 3 046 kwadratnych metrow wulkich wustajenišćach, nimo toho poskićichu lubowarjam literatury 465 zarjadowanjow ze 748 sobuskutkowacymi. Lětsa wotměchu so twarskich naprawow w Přemysłowym palasće dla wiki we wulkich stanach w parku na arealu w Holešovicach, štož při rjanym wjedrje k přijomnej atmosferje přinošowaše.