Choćebuz (SN/CoR). Nowy interdisciplinarny wotrjad Serbskeho instituta „Regionalne wuwiće a škit mjeńšin“ su wčera na onlinowej nowinarskej konferency předstajili. Dohromady wosom sobudźěłaćerjow chce so pod nawodom dr. Lutza Laschewskeho třom temam wěnować: rewitalizaciji delnjoserbšćiny, walorizaciji serbskeje kultury we Łužicy a mjeńšinowej politice. Direktor instituta dr. Hauke Bartels widźi prěni wuspěch wjelelětnych prócowanjow swojeho domu hižo w tym, zo so „serbske temy dźeń a bóle w zjawnosći a politice wobkedźbuja“. Załoženje wotrjada je jedyn ze šěsć serbskich projektow w Braniborskej ze spěchowanskeho programa Zwjazka „Serbska rěč a kultura w strukturnej změnje“ (SN rozprawjachu). Nowy wotrjad ma so hač do lěta 2032 z něhdźe 6,2 milionomaj eurow spěchować. „Chcemy swoju kompetencu nastupajo na ewidency bazowace poradźowanje politiki k dispoziciji stajić a ju dale wutwarjeć“, Hauke Bartels potwjerdźi.