16. rězbarska dźěłarnička w Miłoćicach hižo wopytowarjow přiwabja
Miłoćicy (SN/CoR). Wulka hara je hižo wot daloka słyšeć a proch so wšudźe rozšěrja – po zdaću nic runje wabjace wuměnjenja za publikum. Přiwšěm su wčera popołdnju mnozy starši a młodźi wopytowarjo składnosć wužili a sej w Miłočanskej skale wobhladali, što so tu stawa a nastawa. Wot minjeneje njedźele wotměje so tam mjezynarodna rězbarska dźěłarnička, kotruž towarstwo Kamjenjak 16. króć přewjedźe. Dohromady dźesać wuměłcow z Aziskeje, Afriki a Europy su přeprosyli, a wšitcy su tež dojeli.
