Awtor dźensa

Elias Bětka

Kolesowarske swětowe mišterstwo w Zürichu minjeny tydźeń běchu pisany spektakl z wjele přihladowarjemi, połnym wubědźowanskim programom a njedźelnišim wjerškom, jako wubědźowaše so muska swětowa elita na 250 km parcoursu přez Zürich a tamniši horni kraj. Kaž wočakowane móžeše so jedyn z faworitow přesadźić. Lětuši dobyćer Giro de Italia a Tour de France Słowjenc Tadej Pogačar doby wubědźowanje w spektakularnym solu 06:27:30 h. Awstralčanej Benej O‘Connorej a lońšemu dobyćerjej Nižozemjanej Mathieu van der Poelej zwostaštej jenož městnje dwaj a tři.

W telewizijnych wusyłanjach spóznaješ z perspektiwy helikoptera přeco jara rjenje z mjenom wubědźowarjow pomolowane dróhi. Fanojo napisaja tute do wubědźowanja na asfalt. Pódla mjenow faworitow pak jedne mjeno cyle wosebje husto padny. Njebě pak to žane z elity wubědźowanja mužow.