Sokoł Ralbicy/Hórki

– LSV Hory 1990 1:2 (0:1)

Zestawa domjacych: Gloxyn – von Köding (74. Matka), St. Bjeńš, Lulak, Korjeńk, Wałda, Schultz, Šewc, Šołta, Bejmak (74. M. Kurjat), Domaška

Wjac hač 100 přihladowarjow dožiwi wčera w Ralbičanskim Stadionje přećelstwa načolnu koparsku hru mjez Sokołom Ralbicy/Hórki a tabulkowym susodom z Horow. Kaž hižo w minjenych tydźenjach dyrbjachu domjacy někotrych hrajerjow zranjenja dla narunać. Tak přewza tež hnydom hósć z Horow komando a daše bul cyle měrnje w swojich rjadach běžeć. Sokoljo njemějachu scyła wulce móžnosć, sej jón wudobyć. Dwójce pak so jim to poradźi a hnydom startowachu strašne kontery. Fabian Korjeńk kaž tež Antonius Wałda pak najlěpše šansy wuwostajištaj. Na tamnym boku zadźěwa Gloxyn z dwěmaj wulkotnymaj paradomaj zastatkej, w 33. min. pak bě bjezmócny. Wotfalšowana flanka docpě swobodnje stejaceho Pohla, kiž z dźesać metrow fulminantnje přetwori.

Serbscy triatleća Beno Šołta z Miłoćic, Marian Žur a Daniel Matka z Lejna su so na 21. błótowskim duatlonje w Brjazynje nad jazorom wobdźělili. Wšitcy třo startowachu na ludosportowej distancy 5km běhanje – 22km kolesowanje – 2km běhanje. Cyłkownje bě 117 sportowčow a sportowcow cil doc­pěło. Po sylnym běhanskim wukonje na prěnjej a druhej běhanskej čarje zaměstni so Šołta w cyłkownym hódnoćenju na 10. městnje, z čimž bě jara spokojom. „Njejsym dwaj a poł měsaca trenować móhł, dokelž běch w dowolu a mějach nimo toho ćeže z Achillesowym paskom. Hladajo na to sym jara spokojom“, Šołta rjekny. Wón steješe w Błótach samo na podesće, dokelž bu w swojej sk druhi. Tež Marianej Žurej a Danielej Matce poradźi so w jeju sk skok na dobyćerski podest: Žur bu třeći, Matka druhi. Jurij Bjeńš

Po wurjadnych wuslědkach volleyballistow Serbskeho gymnazija Budyšin (SGB) w hali wubědźuja so woni nětko w pěsku, a to we wobłuku wuchodosakskeho finala. W Budyskej Sprjewinej kupjeli započachu so regionalne wurisanja ze starobnej skupinu III, w kotrejž su sej beachvolleyballisća SGB slěbro wuwojowali.

Awtor dźensa

Toni Ryćer

Što by sport był bjez zahoritych přiwisnikow? Někotryžkuli wuběrny wukon njehodźał so bjez podpěry přihladowarjow docpěć. Tež hdyž je to husto z wulkimi wudawkami zwjazane, wo trěbnym swobodnym času nochcu scyła rěčeć, jězdźa ludźo rady sta kilometry, zo bychu swojim idolam bliscy byli a jim přiwyskali. Podobnje budźe to w juniju, hdyž so Serbja do Južneho Tirola nastaja, zo bychu łužiskej koparskej mustwje pohonjeli. Wězo njeda so to přirunać z wulkimi wubědźowanjemi, kaž na přikład w zwjazkowej kopańcy abo w motorsporće, zmysł pak je samsny a na wotpowědnej euforiji njebudźe falować, toho sym sej wěsty. Nimo toho da so wulět do Italskeje zwjazać z dowolom w krasnej krajinje. Móžu to woprawdźe horco do­poručić. Znaju kónčinu wokoło Puster-Garder- a Ahrntala, hdźež so europeada wotměje, z někotrych zymskich dowolow. Bohužel njemóžu sobu. Sym runje w tym času na motorsportowych wubědźowanjach w Francoskej a Němskej zasadźeny.