Awtor dźensa

Jan Hrjehor

Wuj Jurij sedźeše nalěwo wote mje, kuzenk Jurij naprawo. Běch prěni raz w Rudnych horinach w stadionje třećeho koparskeho ligista FC Rudne horiny Aue. Mój pomjatk mi hižo dokładnje dosć pomhać njemóže, hdy a hdźe sym tutej błudnej akciji moje haj dał. Sedźach z Jurjomaj před třomi tydźenjemi wutoru wječor mjenujcy jako tajny přiwisnik FC Energije Choćebuz na tribunje domjaceho cyłka FC Rudne horiny Aue, bjez FCE-šawla, bjez čerwjeno-běłeho trikota, bjez někajkeje FCE-znački, takrjec jako cyle neutralny fan, kotryž njehodźi so hnydom jednomu z dweju cyłkow přirjadować. Při fanowym spěwanju „Stańće, hdyž sće Aueske!“, so tež pozběhnjechmy a łahodnje placachmy. Nochcemy so přeradźić. Jenož při třoch wrotowych wuspěchach Choćebužanow tak prawje njewědźachmy, kak dyrbimy so w črjódźe „fijałkow“ zadźeržeć, zo njebychmy sej fijałku zapopadnyli. Při 1:0, 2:1 a tež 3:1 za Choćebuz skrótka nalěwo a naprawo mojeju susodow kunksnych a kedźbowach na to, zo wostanu w mjezwoču neutralni.

Radworčenjo w Ćisku

Róli mjez prěnimaj koparskimaj mustwomaj z Ćiska a Radworja stej jutře jasnej, hdyž hladaš na tabulkowu staw. Hosćo z Radworja steja w načolnej skupinje, hosćićeljo w pincy. Přiwšěm pak dyrbi Radworski cyłk kedźbować a so koncentrować. Ralbičanscy Sokoljo su w minjenej hrajnej dobje mjenujcy po podobnej situaciji w Ćisku 3 ličaki ležo wostajili. Njebjelčenjo hraja jutře w Skaskowje a nic we Wóslinku. Hrajny dźeń z dwěmaj hromaj změja njedźelu w Chrósćicach a Ralbicach.

09.11.  13:30  Biskopičanske KT 08 –  

  FC Jednota Rudolstadt

09.11.  14:00   Ćisk 1993 – ST Radwor

09.11. 14:00 Wóslink/Skaskow/Ku-

  low II – SJ Njebjelčicy

09.11.  14:00  FC Energija Choćebuz –

  Borussia Dortmund II

10.11.  11:30  HZ Ralbicy II/Pančicy II     – Radwor II

10.11.  11:30  SJ Chrósćicy II –

  Arnsdorfske KT

10.11.  14:00  SJ Chrósćicy –

  Zeleno-běli Bukecy

10.11.  14:00  Sokoł Ralbicy/Hórki –

  SG Großnaundorf

10.11.  14:00  ST Marijina hwězda –

  ST Wjelećin

Zazběhowa hra za Worklečanki

ST Nadrózna Hrabowka –

SJ Njebjelčicy 1:3 (1:2)

Zestawa hosći: Weclich D. – Schulze, Matješk, Hanuza, Rudolf, Čornak (71. Herrmann), Lehmann (63. Domš F.), Plaettner, Korjeńk (83. Reineke M.), Bjeńš, Domš O.

Njedźelu njehrajachu kaž planowane na twjerdym sportnišću, ale na trawniku w Nadróznej Hrabowce. Zaměr za hrajerjow z Njebjelčic bě wězo tři dypki sobu domoj wzać, zo bychu swoje druhe městno w tabulce skrućili.

TSV 1859 Wjernarjecy –

SJ Chrósćicy 1981 II 3:0 (1:0)

Zestawa hosći: M. Mark – M. Donat, F. Zahrodnik, Dórnik, K. Mark, Sćapan, Budar (63. Kř. Zahrodnik), B. Donat, Wornar, J. Donat, M. Zahrodnik (78. Hojer)

Zašłu sobotu poda so druhe mustwo sportoweje jednotki Chrósćicy na hru do Wjernarjec. Po wysokej poražce zašły tydźeń chcychu Chróšćenjo w tutej hrě swoje woprawdźite kmanosće pokazać.

Do hry hosćo derje startowachu. Z trěbnej agresiwitu sej dwuboje wuwojowachu. Tola w štwórtej mjeńšinje běchu domjacy hrajerjo wuspěšni. Po dołhej přihrawce překročeše bul nimale zakładnu liniju pódla wrotow. Tola komunikaciski zmylk mjez Markec bratromaj přećiwny nadběhowar wuži a skakacy bul z hłójčku do saka stłóči. Po docpěću nawjedowanja wuwi so wurunana hra. Chróšćenjo běchu w ofensiwje chětro aktiwni­, ale njemóžachu sej dosć dobre šansy wuhrać. Třěle z distancy wrotar hosćićela wotwobara. Tež koparjo z Wjernarjec spytachu stajnje zaso so do přećiwniskeho ruma zadobyć, tola hosćo nadběhi derje wotwobarachu. Tak podaštej so mustwje z hrajnym stawom 1:0 do kabiny.