Awtor dźensa

Clemens Šmit

Wšojedne hač sněhakowanje, smykanje, sankowanje abo tež lodohokej – w Serbach su lubowarjo zymskeho sporta tute aktiwity w zašłych lětach lědma wukonjeć móhli. Dołho trajaca zyma, z tójšto sněhom a tež z porjadnym zmjerzkom, haj, to dyrbju najprjedy raz přemyslić, hdy smy tajku prawu zymu posledni raz tu pola nas we Łužicy měli. Wy zawěsće tež, abo?

Pomhać wědźa sej někotři z tym, zo sej k sněhakowanju pak do Čěskeje abo do Rugiswalde dojědu. Zaso druzy podadźa so do Warnoćic abo do Běłeje wody, zo bychu sej tam z přećelemi lodohokej zahrali. A nó haj, někotři su samo tak – wězo pozitiwnje – překlepani, zo organizuja zymski gawdij tež w Serbach cyle bjez sněha.