Zwjazkowy plan wobchadnych dróhow za Hornju Łužicu njespokoja

Budyšin/Wojerecy (SN/BŠe). Zwjazkowy plan wobchadnych dróhow w přichodnych 15 lětach ze stron Hornjeje Łužicy njespokoja. Tak nima nuznje trěbna elektrifikacija železniskeje čary mjez Drježdźanami a Zhorjelcom dale do Pólskeje najwyšu prioritu.

Sakska wšak je trěbne předplanowanja za mjenowany wobchadny plan hižo přihotowała. „Tu zasydlene zawody kaž Bombardier w Budyšinje a Zhorjelcu móhli z eletrifikowanja železniskeje čary profitować a swoje hybridne jězdźidła lěpje dowožować“, potwjerdźa Budyski měšćanosta Alexander Ahrens (njestronjan). Syć měšćanskeje železnicy w Hornjej Łužicy drje je hač do města Wojerec wutwarjena, falowaceje infrastruktury dla pak njejězdźi wona hač do Budyšina a Zhorjelca. Pólska je swoje domjace nadawki mjeztym spjelniła a železniske čary hač na mjezu do Zhorjelca a Hórku elektrifikowała.