Wrócław (SN/MkWj). Z pisanym programom je so wčera wječor w pólskim Wrócławju mjeztym 61. kongres Federalistiskeje unije europskich narodnych mjeńšin (FUEN) zahajił. Cyłkownje 175 wobdźělnikow ze 27 krajow, zastupowacy 54 mjeńšin, hač do soboty wo jich połoženju wuradźuje. Za Serbow staj tam mjez druhim wiceprezident FUEN a jednaćel Domowiny Bjarnat Cyž kaž tež předsyda Domowiny Dawid Statnik.

Na dźensnišim kongresowym wuradźowanju porěča mjez druhim Astrid Thors, komisarka za narodne mjeńšiny w Organizaciji za wěstotu a zhromadne dźěło Europy (OSCE). Wona skedźbni na to, zo je spomóžne zhromadne dźěło narodnych mjeńšin wažne, zo by so konfliktam zadźěwało. Ćim wažniša je sylna FUEN jako politiska organizacija mjezynarodna institucija, kotraž so za mjeńšinowe zajimy zasadźa.

Na kongresu wozjewichu tež postrow pólskeho statneho prezidenta Andrzeja Dudy, kiž dźakuje so mjeńšinam za wažny přinošk k mjezynarodnemu dorozumjenju a wujednanju ludow. Tež wyši měšćanosta delnjošleskeje metropole Rafał Dutkiewicz je so słowa jimał.