Wrócław (SN/MkWj). Aktualne problemy europskich narodnych mjeńšin stejachu w srjedźišću dźensnišeho druheho dnja 61. kongresa Federacije europskich narodnych mjeńšin (FUEN) we Wrócławju.

Zakład wuradźowanja bě, předstajić a rozłožić mjeńšinowy projekt Organizacije za wěstotu a zhromadne dźěło w Europje. Zamołwići běchu minjeny čas naprašniki rozesłali. W nich prošachu mjeńšiny, rysować swoje połoženje, na přikład w naležnosći swojich šulow a zarjadnišćow, kaž tež móžnosće politiskeho sobuskutkowanja.