Nowa studija k wotstronjenju dołhodobnych škodow brunicy dla
Podstupim (SN). Pjenježne srědki k wotstronjenju dołhodobnych škodow wudobywanja brunicy dla koncerny Vattenfall, RWE a Mibrag w dosahacej měrje njezawěsćeja. Bjez spěšneho politiskeho jednanja hrozy strach, zo potrjechene zwjazkowe kraje kóšty dawkipłaćerjam nabrěmjenja. To je hłowne wuprajenje najnowšeho přepytowanja Foruma za ekologiske socialne hospodarstwo a zarjada Institute for advanced sustainability, kotrež dźensa w Podstupimje předstajichu. Klimowa alianca Němskeje, Zwjazk za wobswět a přirodoškit, Heinricha Böllowa załožba a załožba Rosy Luxemburg běchu přepytowanje skazali.
