Čorna Pumpa (JoS/SN). Nowozałožene zwjazkarstwo Łužiske koło zetka so wčera­ na Čornopumpskim industrijnišću, hdźež podpisachu list zwjazkowej kanclerce Angeli Merkel (CDU). 23 wo­krjesow a komunow braniborskeje a sakskeje Łužicy zwjazkarstwu přisłuša a zastupuje zajimy přichodneho hospodarskeho wuwića za milion wobydlerjow kónčiny. „Tele komunalne zwjazkarstwo je historiske“, podšmórny Grodkowska měšćanostka Christine Herntier (nje­stronjanka), kotraž je zdobom jeho rěčnica. „Zhromadnje chcemy wužadanjam strukturneje změny wotpowědować. Žro našeje powěsće je, zo žadamy sej dialog ze zwjazkowym knježerstwom, dokelž zastupujemy zajimy potrjechenych. Nježadamy sej jenož komunalne sobupostajowanje, ale poskićamy tež móžne rozrisanja.“ Łužiske koło orientuje so w swojim dźěle na hospodarske wuwiće přichoda a na pomoc předewzaćam, so w strukturnej změnje nowoorientować a wobstać. „Wěmy, zo je brunica jako přechodna technologija hišće dołho trěbna.